Segun Dr. Ponson-Wever di ASHA: Registra dokternan cu a studia den region no ta soluciona vacatura di specialista

Dr. Ponson-Wever di Asociacion di Specialista Hospital Aruba (ASHA), a lamenta cu a bin cu e comision dos aña pasa pa bin cu un landsbesluit of ordenanza nacional pa atende cu e profesional medico cu a gradua den nos region.

Despues cu nan a cuminsa y entrega un proposicion na ministerio di Salubridad Publico, y tambe nan a yega di manda un documento entre otro cu sugerencianan, tur cos a keda practicamente den status quo durante casi un aña y mey.

Diabierna ultimo, ASHA hunto cu representante di e diferente organisacionnan profesional di salud, manera HAVA, VMSA, ASHA y ADS a participa di un reunion den Parlamento pa bin cu intercambio di opinion riba e registro di AruBig y kwaliteitsinstituut.

Dr. Ponson-Wever a remarca cu na aña 2018 ASHA a wordo invita dor di e mandatario pa forma parti den e comision pa mira con ta bay implementa e ley AruBIG. Nan tabatin reunion cu diferente stakeholder. Nan tabata reunion largo caminda nan a yega di hinca hopi tempo paden y pafo di e reunion pa bin cu un concepto of proposicion cu nan a entrega na minister Dangui Oduber den luna di maart 2018. Despues na juli 2018 e mandatario a bin cu un concepto con e lo implementa e ley. ASHA a lamenta cu nan no a haya niun di nan puntonan cu nan a trece dilanti den e concepto aki.

Na final di 2018 ASHA a bolbe manda un carta of documento largo cu comentario, preguntanan y sugerencianan. Na final di december 2018, ASHA a haya un comentario di minister cu a comenta riba nan carta y eynan el a keda. Despues durante 2019 no tabatin reunion mas, y nan no a tende nada mas di gobierno y tampoco e aña aki. ASHA a keda sorpresa despues cu minister di Salubridad Publico a entrega e ley. P’esey nan a manda un carta pa duna nan punto di bista como asociacion.

Dr. Ponson-Wever a menciona cu ta berdad cu un par di aña pasa, ASHA hunto cu AZV a yega di traha un manporwerplanning, caminda tabata poni cu tabatin un escasez grandi di 40 specialista. El a relata cu un grupo di 50 persona cu a studia den nos region ta basisarts. Pero di e grupo ey tabatin por ta un of dos cu a specialisa. Pa ASHA no ta conoci cual specialismo tampoco. El a menciona cu tin un grupo mes grandi of mas na Hulanda cu tambe ta basisarts y cu ni a specialisa ainda.

Encuanto cuanto vacatura tin pa specialista, el a menciona cu na 2018 tabatin 90 specialista ora cu e comision a wordo lanta. Dos aña despues tin 96. E tempo aya e necesidad di specialista tabata 40 y por ta aworaki e ta rond di 50. Tin vacatura entre otro den specialismo di Internista, Neurologia y Pediatria. Pues diferente specialismo tin vacatura, segun Dr. Ponson-Wever. Igualmente el a bisa cu no nos a bay mucho dilanti pa yena e vacatura aki. Pero pa registra tur e dokternan cu a studia den e region como basisarts no ta soluciona e falta di specialista.

Presidente di HAVA, Dr. Joaquin van Trigt a bisa cu e AruBig ta bay ta specificamente pa specialista y no pa basisarts. Ya cu basisarts no por traha como specialista.