Segun Dr. Maritza Ordoñez di DESPA: “Aruba a bira mas activo”

Dr. Maritza Ordoñez di departamento di Salubridad Publico (DESPA) a bisa cu nan  ta sigui cu nan campaña di biba saludabel y un team ta traha riba dje.  E campaña aki ta basa den un balansa riba bo forma di come tanto pa adulto y mucha.  El a bisa cu e campaña aki ta dunando su resultado ya cu mirando rond pais bisiña y tur loke ta sosode afo, “Aruba no ta mal para”.

Sinembargo e tin e percepcion cu ta existi un descontrol  pasobra nos hendenan no sa kico nos ta come. A pesar cu nan ta bin cu campaña y conseho nos hendenan ta gusta come hopi afo y cuminda cu hopi vet. P’esey e ta bisa cu nos mester ta mas creativo entre otro come cuminda traha den forno y cuminda cu hopi berdura.  Evita di come pan y carni tur ora, y come mas granonan.

Canamento

E obesidad a baha hopi pero e ta keda un problema ainda. Pero di otro banda e ta mira un cambio positivo di mentalidad ya cu e hendenan ta move mas cu antes. “Aruba a bira mas activo”, el a bisa. E ta contento di mira tur fin di siman actividadnan familiar relaciona cu canamento. Pero e ta mira cu ainda falta mas y nan tin cu sigui pusha mas pa e hendenan keda mas activo.

E recomendacion ta 150 minuut pa siman, y e ta haya cu e ta algo posibel y realistico.  El a indica cu Linear Park a bira un escenario unda nos ta wak hende tur ora cu ta cana y nan ta hendenan di tur edad.  “E mensahe si ta yegando na e poblacion, pero nos mester bira mas consciente riba comemento ariba caya”, el a bisa.

 E ta yuda riba e parti di prevencion ya cu esaki ta un tereno cu DESPA ta trahando fuertemente.  “Si bo ta haci bon prevencion bo ta bay wak cu e problema di haya malesa lo ta minimo”, el a bisa.

E balansa aki tin di haber riba cantidad  di cuminda cu bo curpa tin mester. P’esey ta importante pa come cierto porcion den dia. E ta haya cu considerando cu tin crisis alimenticio den mundo nos mester ta creativo hasta pa come. Pero e mester ta un cuminda bon balansa tambe den proteina, carbohidrato, etc… cu mester dividi nan den cuminda pa bo tin un bon balans. “Bo salud ta depende di esey”, el a indica.