Ayera tardi Crisis Management Office (CMO) hunto cu diferente stakeholder a tene un conferencia di prensa extraordinario pa asina brinda informacion y actualisacion pa loke ta trata e situacion di tempo na Aruba.

Rhino Hermans, director di CMO, a splica cu a yama e rueda di prensa cu caracter di urgencia pa motibo di e risiconan cu tabata presenta despues di merdia ayera cu tabata menasa e mesun region atrobe na Aruba

Pa tal motibo e stakeholders, entre otro Meteo Aruba, tabata presenta pa brinda informacion detaya. Director di Meteo Aruba a splica cu e departamento tabatin un situacion cu a premira cu lo por tin efecto pa Aruba y pa e motibo ey a saca un boletin tocante e situacion cu tabata menasante. Segun el a indica tabatin un potencial pa yobida pisa atrobe manera diahuebs y siman pasa diabierna.

Pero den transcurso di merdia a mira cu e situacion mehora basta pa e lugarnan cu semper ta mas propenso pa e yobidanan pasa cual ta e partinan Noord-West cu West di e costa di Aruba. E director a indica pa 3or di atardi, orario cu a tene e conferencia di prensa, cu ya no tin yobida mas den e partinan aki y probablemente lo cancela e boletin cu a saca mainta.

Meteo Aruba a splica cu e atmosfera ta basta humedo y instabil cu ainda toch por tin formacion di nubianan manera cu a sucede diahuebs. A remarca cu mester tene cuenta tambe cu e tera ta basta satura caba locual cu ta haci cu un tiki awasero caba ya ta crea ‘flash flooding’. Meteo Aruba ta keda monitor e situacion y ta avisa pueblo y como e instancianan concerni tocante e desaroyo di e situacion.

Nan a sigui informa cu na un area di Venezuela tin basta actividad di yobida y mas parti west tambe tin nubianan cu lamper y strena. Adicional a indica cu riba satelite por mira cu tin un sistema frontal cu e drenta cu por tin efecto den weekend y dialuna.

Pa loke ta trata e cantidad di awa cu a cay diahuebs compara cu siman pasa diabierna ta menos, pero calculacion ta indica cu diahuebs a cay 20 pa 30 milimeter di awa den e area di Bubaliy Palm Beach y siman pasa e tabata hopi mas, cu un calculacion di 50 pa 60 mm y na algun parti hasta mas.

Pa loke ta e falta di alerta, specificamente diabierna siman pasa, Meteo Aruba a informa cu e momento cu awasero a cuminsa cay di sorpresa y ta ora cu tin cambio di warda, locual a afecta e sistema pa manda un alerta, un aspecto cu nan a sigura mester traha pa mehora pa futuro.

Pa loke e siman aki, nan a indica cu si a actualisa e instancianan concerni y a pone riba Facebook, pero e pronostico di e cantidad di awa cu ta cay ta mas dificil pa indica, p’esey ta keda monitor y actualisa ora cu ta necesario.

Segun e departamento Meteo Aruba tin 24 ora hende, pero un persona cu ta traha den e parti aviacion no tin autoridad di haci pronostico di tempo y den e parti meteorologico tin falta di personal cual ta haci e situacion pa actualisacion un poco mas dificil.

Di parti di Brandweer Aruba, e director a splica cu diabierna siman pasa como diahuebs ultimo Aruba a ser sorprendi pa e awasero pisa. E yamadanan a cuminsa drenta di hendenan cu tabata den problema cu awa. El a indica cu dividi e yamadanan den dos categorial; esnan cu tin mester ayudo pero cu e situacion no ta critico, por ehempel awa den cura nada mas; y esnan cu tabatin mester ayudo urgente, na unda por ehempel awa a drenta paden di cas.

Durante dia Brandweer a aumenta e personal pa pomp awa y a acudi na alrededor di 40 adres pa yuda y pomp awa.

Di parti di DOW a splica cu den casonan aki DOW semper tin un procedura standard di con ta aborda e situacionnan aki. Den e caso aki nan bay semper e salidanan di awa prome pa monitor con esakinan ta, den ki estado nan ta.

A informa cu siman pasa ora awa a cuminsa cay duro sin aviso, e personal di DOW a bay pa tira bista primeramente na e parti di hotel, na Eagle Beach y Sun Plaza, y di eynan tambe na Driemasterstraat y banda di Antraco. DOW a enfatisa cu tur ta ser monitorea pa wak si tin blokeo ya cu e prome rush di awa tin hopi sushedad ta bin cune y mester hala esaki un banda pa e no blokia e salida di awa.

DOW a splica cu awa cu a cay ta hopi y si compara e dos dianan cu awa a cay duro, diahuebs ultimo el a cay 0.7 mm di awa pa minuut y compara cu horcan Ivan, cu tabata 0,67 mm pa minuut, pues e intensidad di e yobidanan recien tabata parecido na esun di un horcan.

Di parti DOW a enfatisa cu e awasero a trece hopi awa y infrastructura di Aruba no ta traha pa asina hopi awa diripiente. Unda cu awa keda pega eventualmente e awa ta desvia, mester djis duna tempo, pero tin caminda cu tin dificultad pa e awa bay e ora DOW mester bay wak kico por haci pa drecha esaki.

Representante di Rode Kruis tambe a informa cu bou di yamada di Directie Sociale Zaken Rode Kruis a saca un ploeg y a bishita varios adres, tanto den Bubali, Koyari Pos Abou y Cunucu Abou pa asina duna asistencia unda tabatin mester.

Rode Kruis a remarca cu nan no ta bay na e casnan haci limpi, nan ta bay na e casnan pa duna asistencia unda mester y ta yuda cu algun articulo si mester di esaki. A indica cu Rode Kruis ta paraat y ta traha cu sistema di response team cu ta sali ora cu tin problema cu awa rond di e isla.

Potretnan: Facebook