Desde februari di 2021 Inspeccion di Enseñansa di Aruba y Hulanda a cuminsa cu un estudio ariba e calidad di enseñansa na Aruba. Den e rapport aki, ‘doorlichting rapport’, diferente recomendacionnan a bin na mesa pa mehora e calidad di enseñansa na Aruba. den luna di januari, durante e conferencia anual di enseñansa, cultura y ciencia entre e 4 paisnan di reino, e rapportnan final di e cuater paisnan a keda presenta y aworaki e rapport di Aruba a keda publica.

Den e rapport final Minister di Enseñansa y Deporte, Endy Croes, a indica cu den luna di februari 2022 a publica un rapport preliminar y cu despues di e publicacion aki inspeccion di Aruba y Hulanda a sigui elabora riba diferente recomendacion den e rapport. Minister Croes a duna sugerencia mas concreto con pa trece cambionan importante den e sistema di enseñansa y a mustra riba diferente condicion necesario pa brinda miho calidad den enseñansa di Aruba. Esakinan a wordo anota den e rapport final.

Den october di aña pasa, Minister di Enseñansa a ricibi e rapport final titula, pero den luna di november el a manda algun comentario riba e rapport final, a duna su punto di bista riba e rapport y a señala cierto punto incorecto. Inspeccion di Aruba y Hulanda a haci e ultimo cambionan den e rapport y dia 19 di januari 2023 Minister Croes a ricibi un rapport final corigi.

Segun Minister Croes a informa, den e rapport final aki ainda a topa cu algun eror minimo y dia 30 di januari 2023 a manda via e-mail algun remarke ainda pa inspeccion di Enseñansa Aruba y Hulanda. E remarkenan aki no a wordo corigi mas y a confirma esey den un e-mail dia 31 di januari 2023 y e rapport di 19 di januari 2023 a keda e version final.

A remarca cu riba e rapport final aki e fecha di october 2022 ta aparece, cual ta e fecha cu a e rapport a wordo entrega oficialmente.

Segun Minister di Enseñansa ta indica, e rapport aki ta duna un bon bista riba e estado di enseñansa na Aruba y por constata cu den e maneho diferente di e sugerencianan presenta den e rapport ya caba tin su atencion y ta aplicando nan hunto cu tur stakeholder den enseñansa.

“Ta mi deseo pa nos sigui traha hunto riba diferente di e sugerencianan treci den e rapport, semper na bienestar di nos enseñansa. Masha danki na tur esnan cu di un of otro manera a aporta na e realisacion di e rapport aki.”

E grupo di trabao encarga cu e realisacion di e investigacion a cuminsa cu e evaluacion di e calidad di enseñansa na Aruba basa ariba tres pregunta central di investigacion cu ta relaciona cu e funcionnan basico di educacion; cualificacion, socialisacion y asignacion, e condicionnan pa haci posibel e funcionnan basico aki y e gestion di e funcionnan aki.

For di 1986 tabatin diferente intento, diferente iniciativanan pa mehora e sistema di educacion na Aruba, por ehempel den e area di idioma di educacion y e periodo di brug den e educacion secundario. Tin disponibel un cantidad di reflexionnan y informenan cu conseho pa mehora e sistema di enseñansa.

E docentenan ta otro pilar di forsa den e sistema di educacion. Den e rapport ta indica cu a papia cu diferente docentenan cu a pesar di e instalacionnan basico cu hopi biaha no ta adecua, nan ta esforsa nan mes pa por brinda e studiantenan un bon educacion, y den casi tur e casonan tin e deseo pa desaroya mas y sigui un formacion adicional.

Den e rapport ta remarca cu na mesun momento ta existi hopi desafionan cuminsando cu e falta di informacion corecto pa por realisa e mehoracion den educacion y establece e prioridadnan. E ta enfatisa cu si no tin bon cifranan clave y serienan cronologico confiabel tocante e desempeño di educacion, por pone den riesgo e evaluacion y siguimento di e mehoracion necesario.

Ariba nivel di scolnan, tambe tin falta den algun ocasion di un sistema operativo di garantia di calidad cu ta permiti e directiva di e scol monitor e calidad di e proceso di enseñansa y aprendisahe y asina implementa medidanan di mehoracion a base di esaki.

Otro desafio subraya den e rapport ta cu un liña continuo no ta presente den tur e scolnan. E scolnan encarga cu e cuido infantil no tin e obligacion di prepara e alumnonan pa kleuter, e scolnan tin consultanan mutuo ariba con e rekisitonan di ingreso di un scol of sector ta coresponde cu e criteria di salida di e otro scol of sector.

Esaki, e wordo enfatisa, ta wordo reforsa pa otro desafio importante, e falta di un opcion cla pa loke ta e idioma di enseñansa y su implementacion consistente. E conexion entre educacion y mercado laboral ta problematico. Na Aruba frecuentemente e dunadonan di trabao ta experimenta cu e studiantenan ta ingresa e mercado laboral no suficientemente prepara.

Na Aruba y Hulanda tambe ta experimenta cu e studiantenan frecuentemente no ta suficientemente bon prepara, por ehempel, den independencia y habilidadnan necesario pa completa cu exito un curso di educacion superior.

E rapport ta declara cu tin falta di den gran medida di regulacionnan adecua ariba e base cual e scolnan ta organisa educacion y inspeccion por supervisa. E gobernacion di educacion no ta na ordo.

Den e siguiente edicionnan di Bon Dia Aruba lo elabora ariba e diferente puntonan di e rapport aki.