Segun nos estado di derecho na Aruba, e poder hudicial ta protege derechonan y libertad, ta defende estado constitucional democratico, ta defende e aplicacion corecto di ley y ta sigura decisionnan di huesnan independiente, imparcial, honesto y experto, basando su decisionnan riba informacion corecto di instancianan gubernamental. Teniendo esaki na cuenta, Bon Dia Aruba ta comparti e siguiente caso pa asina informa comunidad di un proceso abnormal cu a tuma luga na aña 2020 na Aruba.

Un persona ken su orden di deportacion tabata den cuadro legal a wordo laga den libertad, debi cu – segun DIMAS a bisa un Hues Comisario di Corte di Prome Instancia – no tabatin decision ainda riba su asilo y e persona en cuestion no por a wordo entrevista. Pero documentonan oficial di DIMAS ta mustra un escenario totalmente diferente.

E caso LTU nr. AUA202001277 Uitspraak van juni 2020 tin nomber di un persona cu Bon Dia Aruba no ta bay mustra pa motibo di privacidad, y tampoco no ta relevante den articulo aki. Loke ta importante pa destaca ta e proceso y e pregunta si funcionarionan publico a gaña un hues comisario.

Tambe den e decision (beschikking) di DIMAS mes, Bon Dia Aruba a kita e nomber di e persona concerni, su famia y tambe su entrevista personal cu DIMAS riba pakico e persona en cuestion a pidi asilo.

Secuencia di e proceso di e persona concerni:

Segun e ordo hudicial (bevelschrift) di dia 1 di april 2020, minister di Husticia, Seguridad y , Andin Bikker a duna orden pa e persona concerni keda den detencion na Guarda Nos Costa. E hues comisario M. Soffers a determina cu e detencion (priva di libertad) di Guarda Nos Costa ta den cuadro di legalidad.

Riba 25 di mei di 2020 e persona concerni a entrega un peticion: artikel 16 derde lid van de landsverordering toelating en uitzetting (LTU). “Binnen 72 uur wordt de betrokkene voor een rechter-commissaris geleid, die de rechtmatigheid van de vrijheidsontneming toetst. Een bevel tot inbewaringstelling kan door de rechter-commissaris te allen tijde op verzoek van de betrokkene worden opgeheven.”

E peticion a wordo trata pa Corte di Prome Instancia durante un audiencia di dia 3 di juni di 2020, unda tabata presente e persona concerni (via video camara), hunto cu su representante legal; e contra partido a wordo representa door di J.Harewood (DIMAS) y M.E Wernet (GNC) via video camara.

Hues comisario M. Soffers ta considera lo siguiente:

Segun e sentencia cu ta numera LTU nr. AUA202001277, sentencia di 10 juni 2020 punto 4.1 ta bisa:

“E persona concerni a entrega dia 6 di april di 2020 un peticion pa asilo. E ordo di deportacion cu ya a wordo emiti dia 1 april di 2020 no ta caduca door di peticion di asilo. Guarda Nos Costa (GNC) no por deporta e persona concerni a base di e prohibicion di refoulement mientras tanto cu no a dicidi riba su peticion di asilo. Awor cu e persona concerni ta den detencion en espera di e decision di su peticion di asilo, DIMAS mester trata e peticion di asilo mas lihe cu ta posibel.”

Punto 4.2 di e sentencia di 10 di juni di 2020 ta bisa:

“Durante e tratamento di e caso dia 3 di juni di 2020, a sali na cla cu ainda no a tuma decision riba e peticion di asilo di e persona concerni for di fecha 6 di april di 2020. J.Harewood (DIMAS) a duna di conoce durante e tratamento di e caso cu e procedura pa tuma decision a tarda pasobra e persona concerni tabata den cuarentena pa dos siman largo, esaki relaciona cu e reglanan na vigor pa preveni e contagio di corona, cu consecuencia cu e persona aki no por a wordo scucha. E hues-comisario ta compronde locual J. Harewood (DIMAS) ta bisa relaciona cu e hecho cu e procedura pa tuma decision a tarda door di e coronacrisis. Sin embargo, despues di 8 siman, (DIMAS) ainda no a tuma un decision riba e peticion di asilo. Basa riba e circunstancia aki, hues comisario ta wak cu e interes di e persona concerni pa lanta e detencion ta pisa mas cu e interes di J. Harewood (DIMAS) pa laga e persona concerni warda e decision riba e peticion di asilo den detencion.”

Beschikking (DIMAS) di persona concerni fecha 4 mei 2020

Den e caso specifico aki, reportero di Bon Dia Aruba a ricibi un par di documento cu ta contradeci totalmente loke J. Harewood a declara na Corte di Prome Instancia dia 3 di juni di 2020 na hues comisario M. Soffers.

E persona concerni a drenta Aruba di manera legal dia 29 Mei di 2018 riba un vuelo di Aeropuerto Internacional Josefa Camejo, Las Piedras, Venezuela. El a drenta cu su ruman muhe cu ta biba na Aruba.

Dia 6 di April di 2020 e persona concerni ta haci un peticion di asilo na Guarda Nos Costa (GNC).

Como prueba di e persona concerni el a yena un formulario di registracion. A raiz di e peticion di asilo aki e persona concerni a wordo scucha dia 20, 21 y 23 di April di 2020 door di un funcionario di gobierno (DIMAS). A haci e entrevista a base di hechos, tambe despues cu e persona concerni a yena e formulario di registracion el a entrega un copia di e parti dilanti di su paspoort di nacionalidad Venezolano.

Declaracion di J. Harewood (DIMAS) no ta cuadra

Den e sentencia AUA202001277 aki dia 10 di juni di 2020 di hues comisario M. Soffers, den punto 4.1 ta papia un palabra hopi importante, cu ta “prohibicion di refoulement” – ta prohibi un pais pa manda un refugiado (persona cu a haya status di proteccion caba) of un persona en espera di su peticion di asilo, di regreso forsa na nan pais di origen unda nan lo ta obheto di persecucion.

Segun e documento ya dia 4 di mei di 2020, cu ta 31 dia prome cu e audiencia di 3 di juni di 2020, e persona en cuestion tabatin un decision negativo riba e peticion di Asilo caba, y den e parti di documento cu Bon Dia Aruba no lo publica, E.2 Categoriale en of humanitaire bescherming:

“U komt derhalve niet in aanmerking voor een verblijfsvergunning op grond van humanitaire reden c.q. toepasselijkheid van “Non refoulement” op grond van het EVRM op grond van het vorenstaande. Conform het verdrag tot bescherming van de rechten van de mens en fundamentele vrijheden mag niemand worden onderworpen aan folteringen of aan onmenselijke of vernederende behandelingen of bestraffingen. Uit uw verzoek blijkt niet dat naar redelijkheid niet van u verwacht kan worden dat u terug kunt keren naar uw land van herkomst .”

Tambe hues comisario M. Soffers a bisa: “Awor cu e persona concerni ta den detencion en espera di e decision di su peticion di asilo, DIMAS mester trata e peticion di asilo mas lihe cu ta posibel”. Pero segun pagina 3 di documento cu Bon Dia Aruba a publica, DIMAS no por trata algo mas lihe cu ta posibel si e persona en cuestion ya tabatin un decision negativo riba su peticion di asilo riba dia di 4 di mei di 2020.

Riba punto 4.2 di e sentencia di dia 10 di juni di 2020 di hues comisario, J. Harewood (DIMAS) a duna di conoce durante e tratamento di e caso cu e procedura pa tuma decision a tarda pasobra e persona concerni tabata den cuarentena pa dos siman largo, esaki relaciona cu e reglanan na vigor pa preveni e contagio di corona cu consecuencia cu e persona aki no por a wordo scucha. Segun pagina 2 di e documento y mas investigacion periodistico, e persona en cuestion a wordo scucha dia 20, 21 y 23 di April di 2020 door di un funcionario di gobierno (DIMAS), cu ta 44 dia prome cu e audiencia di e persona en cuestion, cu ya a wordo entrevista caba door di un funcionario di gobierno (DIMAS).

Basa riba loke J. Harewood (DIMAS) a declara den corte, hues comisario ta wak cu e interes di e persona concerni pa lanta e detencion ta pisa mas cu e interes di e J.Harewood (DIMAS) pa laga e persona concerni warda e decision riba e peticion di asilo den detencion.

Bon Dia Aruba a tuma contacto cu minister di Integracion, Glenbert Croes dia 17 di juni ultimo, si nos ta bay un tiki atras, na april di 2020 e maneho di DIMAS tabata cay bao ex-minister Andin Bikker segun e LIM (Landsverordening Instelling Ministeries 2018) y e gobernacion ta un continuacion. Na e momentonan aki minister Croes ta responsabel di DIMAS, y a dirigi algun pregunta na su persona y a comparti un par di documento, pero Bon Dia Aruba no a haya contesta te ciere di edicion aki.