Segun dirigente sindical di SEPPA, Edmundo Marlin: Si no tin reaccion malcontento di trahadonan por escala na Serlimar

Ayera mainta trahadonan di Serlimar na San Nicolas a dicidi di bay den accion di dos ora, cu presencia di e dirigente sindical di SEPPA, Edmundo Marlin.

Marlin a declara na Bon Dia Aruba cu e trahadonan ta discuti cu e actitud di minister Marisol Lopez-Tromp, cu no a duna cara durante un reunion cu e mandatario y gerencia di Serlimar tabatin cu e trahadonan y SEPPA, cu ta representa un grupo grandi di e trahadonan di e compania estatal aki. E sindicalista a bisa cu e accion aki tabata di dos ora so, ya cu pa 9or di mainta el a caba.

Awor SEPPA y e trahadonan ta na spera di e reaccion di gobierno of conseho di minister. Marlin a bisa cu e trahadonan a vocifera cu ‘si no tin un reaccion e cos aki por escala’.

No tin un ultimatum, pero si nan ta wardando cual ta gobierno su reaccion y si nan ta dispuesto pa sinta na mesa. Ya cu e reunion aki mester a tuma luga diahuebs atardi, pero e minister no a presenta. Marlin a laga sa cu e mandatario no a manda niun excuus, tampoco e no a manda bisa nada. Despues di e accion aki nan ta wardando un reaccion ya sea di gobierno, conseho di minister of for di e minister en cuestion mes.

Solamente ora cu SEPPA a presenta na e reunion, director di Serlimar a anuncia nan cu e mandatario ta cay laat. Pero despues e no a presenta. Tampoco nan no a haya niun splicacion despues for di Lopez-Tromp.

Reunion

El a bisa cu diahuebs ultimo nan tabatin programa un reunion pa 3or atardi na e sede di Serlimar na Pos Chikito. Pero unabes cu nan a presenta pa atende e reunion, e trahadonan a wordo informa dor di e director di Serlimar cu e minister lo yega mey ora laat. Nan a cuminsa cu e reunion un cuart pasa di tres, unda a wordo duna algun informacion preliminar den spera di e mandatario pa asina e reunion oficialmente por tuma luga.

Sinembargo 45 minuut a pasa y ainda e mandatario no a presenta. Marlin a splica cu a pesar di e tardansa aki, nan a dicidi di dun’e 10 minuut y banda di 3:55 atardi, e trahadonan representa pa SEPPA su pasenshi a caba. Nan a dicidi di bandona e luga ya cu e reunion a wordo yama cu presencia di minister Lopez-Tromp. “E minister no a show,” e dirigente sindical a bisa.

Unabes cu SEPPA a informa e trahadonan cu e mandatario no a presenta, nan a rabia y nan a dicidi di protesta ayera mainta tempran. Di e forma aki, nan kier mustra nan mal contento. El a bisa cu e trahadonan mester tin claridad y haya informacion riba kico lo bira e futuro di Serlimar.

“Tin cosnan eynan afo cu ta wordo papia y e trahadonan kier sa kico ta bay pasa realmente,” Marlin a bisa na Bon Dia Aruba. Nan ta un grupo di alrededor di 200 trahado, caminda mayoria di nan ta afilia na SEPPA.

SEPPA a dicidi di pone e exigencia di e trahadonan riba papel y nan a yega di manda un carta pa conseho di minister. El a bisa cu nan a entrega e exigencianan aki mas prome. Dia 19 di maart ultimo nan a manda un carta na e minister encarga cu Serlimar pa expresa nan preocupacionnan. Pero nan ta mira cu den cierto momento e preocupacion cu nan tabatin a bira mas convincente. Nan a yega di manda otro dos carta pa minister, pero sin haya niun contesta di dje.

SEPPA a dicidi di manda e mesun carta aki pa conseho di minister. Den e carta nan ta mustra cu gobierno ta shen porciento doño di Serlimar y cu e compania aki ta patrimonio di pueblo. P’esey nan ta pidi pa gobierno por duna atencion na e compania aki pa e situacion cu tin. Pero tambe claridad riba tur locual ta wordo ‘specula” afo, el a bisa.

Unabes cu e carta aki a wordo atendi den conseho di minister, minister president Evelyn Wever-Croes a pidi -segun SEPPA- na minister Lopez-Tromp pa sinta na mesa cu SEPPA pa atende cu e preocupacion di e trahadonan. Esey ta e reunion cu nan tabatin diahuebs atardi cu minister Lopez-Tromp no a presenta y e trahadonan a rabia, segun sindicalista Marlin.

“E trahadonan a rabia pasobra nan di cu e minister no ta dunando atencion na Serlimar pa locual tur e cosnan cu ta wordo papia ultimo temponan aki,” el a laga sa. E trahadonan ta masha preocupa y nan lo desea sa kico lo bira e futuro di e empresa aki. “Nan ta sinti cu tin algo cu ta andando y no tin claridad y no tin transparencia,” el a agrega.

Apesar cu tin otro sindicato aden, SEPPA cu ta representa e mayoria di nan, ta mira cu e situacion ta bira diferente, ya cu e ta bay costa e trahadonan nan pan. Si sindicato no por salvaguardia Serliman pa keda un compania estatal di pueblo y di gobierno.

SEPPA por scucha e mandatario papia di plan y rescata, pero niun hende ta mirando nada y e sindicato tampoco ta envolvi den e planeamento pa bay rescata Serlimar den e forma cu nan kier bay haci’e. E ta haya cu finalmente esaki ta bay refleha ariba e posicion huridico di e trahadonan.