Directora di Skoa, Anuesca Baly a lamenta y condena e candela intencional cu a destrui cuater klas na Cacique Macuarima School, dialuna madruga.
E ta haya cu e acontecimento aki, rechasa pa henter comunidad, no ta un acto di vandalismo sino cu el a bay den un dimension di un acto criminal. Ya cu esunnan cu a realisa e acto aki a comete un crimen contra educacion di bo pais.
“Como Skoa e ta dal bo duro… Tur cos a keda destrui y ta haci nos sigur, como parti di Skoa, hopi tristo,” cu un bos kibra el a bisa. Aunke e biaha aki tabata un scol di Skoa, e ta haya cu e por tabata otro scol cu no ta cay bou Skoa. Igualmente e por tabata ta un cas di un persona cu ta wordo kima of otro tipo di establecimento.
Pero fundamentalmente Skoa ta mir’e como un golpi na nos sistema di educacion. Considerando cu nan tarea no solo tin cu haci cu educacion, sino cu formacion di nos hendenan y di nos comunidad, esaki ta haci e golpi aki mas pisa cerca nan.
“Ora cu algo asina aki ta pasa, nos ta puntra: Ta kico por a bay robes?,” el a bisa na Bon Dia Aruba. Algo cu Skoa ta considera masha importante ta e triangulo di cas, alumno y scol. Y den e caso aki, e ta prefera di menciona scol hunto cu parokia, ya cu nan ta un fundacion cu ta atende cu scol Catolico.
Situacion actual.
Temporalmente Cacique Macuarima School cu ta cay bou Skoa lo permanece cera te ora cu un investigacion ta tumando luga. Pero tambe ora cu e scol aki lo wordo condiciona y pone e coriente, nan lo habri bek. Mientras cu e cuater klas afecta lo keda clausura pa wordo drecha lo mas pronto posibel. Baly a bisa cu eventualmente dialuna awor Cacique Macuarima School lo habri bek.
Mientras cu e alumno di e cuater klas destrui y afecta pa e candela lo wordo re aloca den otro scolnan temporalmente. Mirando cu nan scolnan ta di bario, nan ta sondea e scolnan relativamente cerca di Cacique Macuarima School na Sta. Cruz. Nan tin scol Laura Wernet cu ta bay tuma algun alumno y tambe scolnan na Pos Chikito. Di e forma aki e alumnonan di e cuater klas daña lo haya nan lesnan mas pronto posibel pa nan no wordo perhudica. Unabes cu nan ta re aloca e alumnonan, nan lo bay pa e di dos fase. E fase aki, cu ya caba nan a cuminsa, tin di haci cu e luga mester wordo limpi y despues mira cual lo ta e siguiente pasonan. Directora di Skoa a laga sa cu Prome Minister, Evelyn Wever-Croes, a papia cu nan, caminda e mandatario a compromete pa gobierno duna su ayudo pa haci e cuater klas accesibel pa e muchanan mas lihe posibel.
Gradicimento.
Directora di Skoa a expresa su gradicimento riba tur expresion di solidaridad y ayudo pa atende cu e suceso condenabel na Cacique Macuarima School. Sinembargo e shock emocional cu esaki a causa, muy specialmente cerca e cabesante, personal y alumno di e scol menciona, no ta facil pa deal cune. Pero Baly ta haya cu mester pensa semper positivo. E ta consciente cu un candela ta un siniestro hopi destructivo cu ta laga atras hopi destruccion y ta destrui recuerdonan cu bo no ta recupera mas.
“Candela ta algo cu bo no por trece nada bek,” el a bisa. Ademas di e peso emocional, tambe e dañonan laga atras pa e candela, tin su peso financiero cune. Ya caba nan a cuminsa atende cu e parti di seguro y kico nan ta cubri di e dañonan den e edificio di scol. Tambe nan ta hayando solidaridad di e coleganan di otro scolnan di Skoa cu a ofrece nan ayudo.
Pero directora di Skoa no kier cu e mal experiencia aki por bira algo cu ta demotiva hende, specialmente e personal y alumnonan di Cacique Macuarima School. Aunke e ta algo horibel, pero unabes cu el a pasa, directora di Skoa ta di opinion cu awor nan tin cu pensa con nan por drecha e dañonan ocasiona mas lihe cu ta posibel.
A pesar di e situacion aki, Baly a laga sa cu nan lo sigui cu nan actividad di Skoa Expo cu lo tuma luga for di 12’or merdia te 8’or anochi, diasabra awor na Renaissance Convention Center. E expo aki lo conta cu e presencia di 46 scol rond di Aruba cu ta cay bou e paraplu di Skoa.
