Unabes cu minister di Turismo, Dangui Oduber a anuncia e fechanan tentativo entre 15 di juli y 1 di juli pa habri nos frontera, Aruba Tourism Authority (ATA) pa medio di su directora, Ronella Tjin Asjoe-Croes a bisa cu nan ta den full swing trahando riba e reapertura aki.

Ta asina cu ATA conhuntamente cu su socionan pa preparando pa un reapertura. Nan a tuma e decision di fiha un fecha como meta, cu ta un hecho sumamente importante. Na e momento aki e fecha ta fiha pa mita di juni of final di e mesun luna.

Mester para keto na e hecho cu Aruba ta conoci como un isla sigur, esey ta e motibo pa cual hopi persona ta bishita nos isla, el a bisa. E halto ehecutivo di ATA a bisa cu nan sa cu siguridad aworaki ta sumamente importante, no solamente den e contexto cu nos semper nos a conoce. Esta siguridad contra robo y contra crimen. Pero aworaki siguridad contra e Covid-19. Pa e motibo ey, diferente paso adicional mester wordo tuma. “Mester bisa cu e manera con un pais ta maneha e crisis ta suma importancia,” el a bisa.

Tjin Asjoe-Croes a trece dilanti cu den diferente studio haci tocante e turismo, a sali na cla diferente aspecto. Nan a puntra e Mericanonan cu ta e sector primario di nos turismo, si nan lo bishita paisnan di Asia of Europa y un gran porcentahe a bisa cu nan lo haci’e, ora cu tin un vacuna. Sin embargo ora nan a puntra tocante e area de Caribe, e parti di vacuna no tabata e mas importante. Un 14% nan contesta tabata ta cu nan ta dispuesto pa biaha, manera cu e medidanan ta wordo kita na Merca.

Segun directora di ATA, e resultado aki ta bisa nos cu otro continente tin mas barera pa bishita e paisnan ey for di nos mercado primario cu ta Merca. Pero mirando cu un 14% so di e mercado aki a bisa cu ta dispuesto pa bishita Aruba inmediatamente, e ta mustra cu nos cu e proceso aki ta bay ta un etapa gradual di recuperacion. Mas ainda si nos tene na cuenta cu Aruba ta un di e paisnan mas dependiente di turismo na nivel mundial, manera organismo di evaluacion Standard & Poor’s a yega di indica pa medio di un estudio. Pues sigur cu nos esfuersonan mester ta hopi mas cu otronan, segun directora di ATA

“Turismo ta representa un 10% di e GDP mundialmente locual ta refleha cu e ta un industria importante na nivel global. Nos dedicacion y compromiso mester ta hopi mas fuerte, compara cu otro paisnan cu no ta asina dependiente di e sector aki,” Tjin Asjoe-Croes a declara.

Igualmente directora di ATA a indica cu nos ta papiando di un soft re-opening, pasobra simplemente turismo no ta bay ta mescos cu antes.

E soft re-opening aki ta bay permiti nos pasa den un faceta pa nos test nos mes, y test nos protocolnan tambe. E cantidad di bishitante cu nos ta spera, unabes nos ta habri, ta bay ta menos cu 10% di locual nos ta ricibi usualmente den un luna.

Unabes cu ATA ta introduci e protocolnan pa e sector turismo, tur hende mester traha riba esey. Nan ta bay tin algun siman pa prepara tur esey, cu ekipo di trabao di cada organisacion teniendo como deadline e fecha tentativo cu a wordo poni pa habri nos frontera.