Segun directora di ATA: Ronella Croes Vacuna ta e unico solucion pa recuperacion

Segun directora di Aruba Tourism Authority (ATA), Ronella Croes, aña 2021 ta habri cu hopi reto, ya cu e cantidad di casonan positivo di Covid-19 ta halto den diferente di nos mercadonan clave, incluyendo Merca. E situacion aki no solamente ta afecta turismo pa Aruba, pero e ta afecta turismo en general.

E hecho cu aworaki ta wordo papia di e vacuna, y pronto na mita di februari venidero Aruba lo haya e prome lote di vacuna di Pfizer for di Hulanda, esaki ta trece speransa y ta un oportunidad pa recuperacion, segun directora di ATA.

“E ta e unico solucion pa recuperacion,” asina e alto ehecutivo di turismo a bisa.

Mirando cu e vacuna aki ta wordo introduci no solamente na Aruba, pero den diferente di nos mercado importante den un manera gradual, e proceso aki lo tuma su tempo.

Di parti di Aruba nos ta sigui exigi na tur bishitante un resultado negativo di e PCR test, como un di e rekisitonan di entrada. Actualmente cu esunnan concerni, ATA ta dialoga pa dicidi na dado momento si lo acepta e vacuna como un luz berde pa por permiti e bishitante pa drenta Aruba.

Riba e punto specifico aki y den e mesun linea cu ATA, recientemente minister di Salubridad Publico, Dangui Oduber, kende tambe ta responsabel di e cartera di turismo, a bisa cu te ainda nan no a tuma un decision riba esaki. Kiermen si lo bira un obligacion si nan lo bay condiciona e turistanan cu ta bin Aruba cu mester tin e vacuna, prome cu nan biaha pa bin nos isla. Ya cu obviamente e tipo di exigencia aki ta bira un drempel pa pais Aruba.

Ya ATA ta bin hayando pregunta di e bishitantenan riba e politica di vacunacion na Aruba. Directora di ATA no ta descarta cu na dado momento Aruba lo anuncia esaki debidamente. Ya cu e biaheronan ta sigui scoge e destinacionnan cu ta brinda nan e confiansa di ta un destinacion safe.

“Unda protocolnan ta na ordo y sigur nan experiencia ta conta den esaki tambe,” asina directora di ATA a laga sa durante e ultimo conferencia di e Crisis Team.

Pero di otro banda un tendencia cu nos mester tene na cuenta -segun Ronella Croes- ta cu e biaheronan ta busca e flexibilidad pa por ahusta nan biahe of cancela nan biahe mes, y sigur nan ta buscando prijsnan pagabel pa un biahe. El a remarca cu nan ta aspectonan cu ta keda importante considerando e situacion global den diferente di nos mercadonan.