Director di WEB, Luis Oduber a bisa cu e permiso di e tereno cu tin di haber cu nan proyecto di solar park ta den proceso. Bon Dia Aruba a denuncia ora cu WEB a inicia e fase di construccion of ‘groundbreaking’ di Sunrise Solar Park, cu e tereno cu nan ta huur di Refineria di Aruba (RdA), no tin un permiso a base di ley vigente pa cuminsa e construccion. Ademas -segun ley di Hinderverordening pa ‘inrichtingen’ manera e parke solar, mester un permiso di hinder.
E ley ta rekeri tambe cu mester entrega un peticion y haci esaki publico pa asina entre otro pone e habitantenan den bisindario na haltura. Nan tin e derecho pa entrega un obhecion si nan ta sinti esaki ta necesario. Den caso cu lo otorga e permiso, mester entrega peticion tambe pa un permiso di construccion (bouwvergunning), unda tambe tin e posibilidad pa ciudadanonan entrega un obhecion pa esaki. Nan ta aspectonan di ley cu WEB (y tur otro compania) mester cumpli cu ne den e tipo di proceso aki.
Contaminacion
Sr. Oduber a tuma nota di un articulo di prensa unda ta bisa cu e tereno caminda e parke solar mester wordo instala, ta un tereno contamina. Segun investigacion cu e matutino aki a haci, ta net e area scogi pa bin cu e proyecto aki ta unda Valero a dump asbest ilegal. RdA a haci palabracion cu e doño anterior aki di e refineria, pa limpia e asbest pero manera Bon Dia Aruba a publica varios biaha, dumpmento di asbest of otro substancianan cu ta malo pa salud, hende y animal, no por riba e tereno di refineria. Segun sr. Oduber nan a laga un compania externo haci e estudio necesario pa tuma muestra pa asina tin un bista cla y evita cu esaki lo por tin efecto riba salud di hende. “Nos a controla e superficie locual tin ariba”, el a bisa. A controla e calidad di tera na un meter di profundidad y “nos no a haya nada eynan”, e director ta bisa. Sr. Oduber ta sigui splica cu mester tene cuenta cu den e proyecto aki di e solar park, nan no lo ta cobando pa instalacion. Sr. Oduber no a descarta cu si nan mester coba mas profundo of kisas den otro localidad por tin contaminacion, manera a wordo informa. “Pero caminda nos t’ey nos no a haya nada”, el a declara na Bon Dia Aruba. E director di WEB a finalisa bisando cu e proyecto pa bin cu un parke di molina ta algo cu nan ta kere den dje tambe. Esaki pa motibo cu a keda demostra cu e ta un energia renovabel cu ta wordo produci durante practicamente 24 ora pa dia, y asina nan por saca miho probecho. Di otro banda, solo ta genera energia durante un rato so den dia, segun Sr. Oduber.
