Segun director di hospital, Jacco Vroegop: ‘Relacion entre hospital y laboratorio’ motibo pa no usa laboratorionan priva

Recientemente, den un relato di portal online NoticiaCla, director di Hospital Dr. Horacio Oduber, Jacco Vroegop a contesta e motibo pakico no kier usa laboratorionan priva pa haci test di Covid-19.

NoticiaCla a bin cu pregunta como siguimento di e declaracion di AZV, den cual a indica cu no ta mira ningun motibo pa amplia e cantidad di laboratorio cu ta haci test pa Covid-19. Asina a rechasa e solicitud di laboratorionan priva pa haya e posibilidad pa realisa e test aki bao di AZV. Director di AZV, Edwin Jacobs a bisa riba diahuebs cu Fundacion Servicio Laboratorio Medico Aruba (FSMLA), conoci como Labhob, ‘por cumpli cu e demanda di nos aseguradonan’, agregando cu ‘tanten cu esaki ta e caso, AZV no ta mira motibo pa amplia e cantidad di laboratorio pa haci e testnan’.

E pregunta pakico no ta permiti laboratorionan priva haci test di Covid pa AZV a bin dilanti siman pasa durante un conferencia di prensa di Minister di Salubridad Publico, Dangui Oduber. Oduber e dia ey a indica cu ‘AZV ta cubri PCR test na Labhoh pasobra hospital ta inverti e entrada ey back den hospital’, y maske Oduber a indica cu ta habri pa trece cambio den e situacion, e declaracion di Jacobs ta indica cu AZV no tin e intencion pa esaki actualmente.

NoticiaCla tambe a puntra Jacobs tocante e rijnan largo cu comunidad por a nota recientemente pa bay haci test di Covid, y si esaki no ta un motibo pa amplia e cantidad di laboratorio cu por haci e servicio, asina aliviando e presion y eliminando tempo di espera. Jacobs a contesta cu FSMLA mes a amplia su capacidad, y ta cumpliendo cu tur persona cu ta yega haci test. “Di loke nos ta comprende di FSMLA nan tin capacidad pa maneha esaki” Jacobs a comenta.

Algun laboratorio a comenta cu loke ta sucede cu FSMLA no ta corecto, pasobra ta trata aki di dos entidad separa, y no por move fondo asina di uno pa otro. Sr. Jacobs a referi na hospital pa un contesta riba esaki.

Director medico di Hospital, Vroegop a contesta: “Hospital Horacio Oduber y FSMLA en berdad ta institutonan diferente, pero tin si un acuerdo di cooperacion (SLA), mesun directiva y Raad van Toezicht.”

Vroegop a continua bisando cu ambos fundacion ta opera sin fin di lucro (non-profit), y ta hinca tur surplus back den cuido di salud. “Esaki den ambos instancia contrario na e caso di e laboratorionan priva.”

Otro bentaha di usa FSMLA, segun Jacobs, ta cu laboratorionan priva no por haci peticion pa tweedelijnsaanvragen, cu HOH/FSMLA si por, beneficiando asina rapidez y exactitud den cuido di pashent. “Esaki pasobra e testnan ta disponible mesora pa e specialista y pashent, cu ta pone cu nan por sigui miho”, Vroegop a bisa NoticiaCla. “Banda di esaki, hospital a inverti for di prome dia den e set up di e cuido di Covid test, Aruba Health App, entre otro. E laboratorionan priva, e tempo ey no tabata kier esey mes”, Vroegop a finalisa.