E siman aki, portal Colombiano, Portafolio, a publica un combersacion cu director di ATA na Latino America, Jordan Schlipken, kende a resalta e crecemento di turismo for di Colombia na Aruba.
Den su articulo, Portafolio ta nota con Aruba ta sigui consolida como un destino preferi pa Colombianonan, danki na su cercania, diversidad di experiencia y excelente conectividad aereo.
Na 2024, Aruba a ricibi alrededor di 65mil bishitante for di Colombia, consolidando asina como un mercado clave den e region. Ademas, e yegada di bishitante for di America Latino a alcansa un total di 182,383 persona, reflehando e interes continuo pa nos isla. Colombianonan ademas a gasta un promedio di 403 dollar pa carchi, segun datonan indica pa Visa spend data.
Schlipken a bisa Portafolio cu e yegada di Colombianonan na Aruba a aumenta significantemente, consolidando como un mercado clave pa nos isla. Colombianonan ta haya na Aruba un destino cercano y diverso, ideal pa disfruta romance, bienestar, turismo responsable y gastronomia.
El a bisa cu entre e lugar y actividadnan mas popular ta Eagle Beach, reconoci como un di e miho beachnan na mundo, y cu ta un lugar preferi pa relaha riba santo blanco y landa den e awa blauw cristalino. Palm Beach tambe ta masha gusta, ya cu e ta un zona vibrante cu hotelnan exclusivo, restaurantnan di calidad, tienda y actividadnan acuatico emocionante. Tambe el a resalta Baby Beach pa su awa trakilo y poco profundo como un preferencia pa famianan.
Schlipken a bisa cu na 2025, Aruba ta resalta cu novedad cu ta enrikece nos oferta turistico, combinando luho, cultura y experiencianan unico. El a menciona e apertura di Joia by Iberostar na Eagle Beach, cu ta operando desde december ultimo, St. Regis Aruba Resort na Palm Beach, habri desde januari ultimo, y Secrets Baby Beach cu ta bay tin su inauguracion na juni di 2025.
Segun Schlipken, tin otro atraccionnan importante, manera Carnaval, cu ta un di e celebracionnan cultural mas importante di region Caribe cu su paradanan yen di color, musica y alegria. Bishitantenan tambe ta disfruta di deporte acuatico, y exploracion cultural na San Nicolas.
Tocante kico por spera pa 2025, Schlipken a bisa cu Aruba ta proyecta avancenan importante den su relacion cu Colombia y America Latino, enfoca riba consolida y diversifica su presencia den e region, kiermen mantene e fluho actual di bishitante for di Colombia, resaltando e accesibilidad, diversidad di experiencia y conexion aereo cu ta facili8ta nan yegada na Aruba, aumentando un 4 porciento compara cu 2024. Ademas, nan ta proyecta un crecemento di 6 porciento den henter mercado di America Latino compara cu 2024.
“Nos ta spera di sigui tuma stap den direccion di turismo responsable, cu iniciativanan cu ta promove practicanan sostenible y ta atrae bishitantenan interesa den experiencianan autentico y consciente di e entorno,” Schlipken a bisa Portafolio.
El a menciona tambe e intencion pa expande presencia den mercadonan strategico, manera Argentina cu crecemento di 5 porciento compara cu 2024; Chile y Peru cu 17 porciento cada un compara cu 2024, y Brazil cu 49 porciento, probechando di e aumento di vuelo y adaptando e oferta turistico na e preferencia di e paisnan aki.
Bayendo back na e mercado Colombiano, Schlipken a finalisa bisando cu Colombia ta representa un mercado di prioridad pa Aruba, debi na e interes grandi cu Colombianonan ta mustra nos isla. Ademas, e perfil di e biahero Colombiano ta fit perfectamente cu e oferta di nos isla, cu ta combina luho, naturalesa y cultura. E mercado aki ta keda esencial pa diversifica y mantene e fluho di bishitante den e region.
