Den un comunicado cu Departamento di Salud Publico di Aruba (DVG) a manda pa medionan di comunicacion social, nan a informa cu for di dia 17 februari 2021 cu Aruba a cuminsa haci uso di e vacuna di Pfizer pa combati COVID- 19, continuamente ta monitor e efectonan secundario (“side effects”) cu esaki por tin cune, y tambe e efectividad di e vacuna.
Te cu dia 3 di juni nan a resumi cu tin 63.925 persona cu a wordo vacuna di e cual efectonan secundario raporta na DVG via diferente canalnan tabata minimo y tambe lo usual.
Pa loke ta trata efectividad di e vacuna nan por a resumi cu for di dia 17 di februari te cu dia 3 di juni, un total di 3.010 persona a test positivo pa COVID-19 di cual 2859 no a ricibi ningun vacuna, 151 a ricibi 1 vacuna y 19 a ricibi 2 vacuna. Por tuma nota cu e data aki ta igual na loke estudionan di Pfizer ta indica, cu ta un efectividad di aproximadamente 95%.
Segun informacion ricibi di hospital for di 17 di februari te cu 3 di juni, di e 3.010 personanan cu a test positivo, 250 a wordo ingresa den hospital pa extra cuido medico debi na complicacionnan respiratorio relaciona cu COVID-19 den hopi caso pa extra zuurstof.
Di e 250 personanan cu a wordo interna pa COVID, 235 persona no a ricibi ningun vacuna, 5 persona a ricibi vacuna y a wordo infecta cu COVID menos cu 14 dia despues di e prome shot, 10 persona a ricibi un vacuna y 3 persona a ricibi tur dos 2 vacuna.
Nan tambe a informa cu e ultimo grupo a wordo interna mas di 14 dia despues di vacuna pa complicacion di Covid-19, ta importante pa menciona cu di esunnan cu tabatin 2 vacuna ningun a wordo interna den ICU pa motibo di COVID.
DVG por medio di analisis continuo ta tuma nota di e efectividad di e vacuna, pa cual motibo ta sigui promociona esaki tambe, esunnan cu ta test positivo pa COVID-19 a pesar cu a wordo vacuna, ta experencia e sintomanan di COVID hopi liviano y ta recupera hopi lihe, esaki ta haci cu e posibilidad pa desaroya complicacion ta wordo minimalisa y e posibilidad pa fayece debi na complicacion relaciona cu COVID ta limita.
