Mientras cu e cantidad di caso positivo pa Covid-19 ta bahando, y maske vacunacion entre nos residentenan ta na 62%, pa loke a flexibilisa medidanan relaciona cu e pandemia di coronavirus, segun informacion di Departamento di Salubridad Publico DVG, ainda mester sigui usa tapaboca y mantene distancia social.
Manera Sharine Koolman, hefe di departamento di malesa contagioso, a anuncia durante un conferencia di prensa, te ainda ta falta un grupo grandi pa vacuna. Teniendo cuenta cu e grupo aki, el a remarca cu esnan cu edad bao 18 aña nan no a cuminsa vacuna, loke ta nifica cu mucha- y hobennan bao 18 ainda por haya e virus SARS-CoV-2, causante di e malesa Covid-19.
Di esaki, el a comenta cu si un hoben ta haya y e ta hiba e virus pa un persona adulto, cu por ta den edad di mas di 60 aña, cu pa un motibo of otro no a haya e vacuna ainda, of no por vacuna pa motibonan medico, e hoben por transmiti e virus pa e persona en cuestion.
“Nos no ta full cla ainda. Nos a yega na 62% [di poblacion vacuna], pero ainda tin diferente pockets den e poblacion, loke ta nifica cu esunnan bao 18 aña por draai un epidemia ainda y hib’e na esunnan mas grandi cu no a vacuna pa diferente motibo”, Koolman a expresa.
Ta p’esey cu no por kita ainda e uso di tapaboca y distanciamento social. Koolman ta pidi pa comunidad purba di evita aglomeracion di hende, y aunke samenscholingsverbod a wordo elimina, mester mantene e regla aki mirando tur e dificultadnan cu Aruba a pasa aden durante pandemia di coronavirus.
“Nos sa cu tin eleccion na caminda. Nos ta pidi encarecidamente como grupo medico pa ora personanan ta den grupo mantene nan mes cu 1.5 meter di distancia of usa tapaboca.” Di mesun manera, Koolman a declara cu si un cos chikito por bay fout, por bolbe haya un situacion cu por ta di lamenta.
