Despues di e control cu a tuma luga pariba di brug na 105 localidad, departamento di Higiena y Inspeccion di Alimento ta informa cu 21 di nan a wordo cera. E control a bay conhuntamente cu departamento di Asunto Economico y Polis.
Directora di e departamento, Yvette Geerman a bisa cu nan a bin cu un control riguroso den e districto di San Nicolas y awor nan tin pendiente pa controla e districto di Noord. “E otro 60% ta bon y un 19% tabata mas of menos”, directora a bisa referiendo na e luganan controla.
Aunke e cifra di localidad cera ta grandi, Sra. Geerman ta prefera prome di bin cu comparacion con e situacion tabata prome; y sin duda e ta haya cu e cantidad ta keda hopi. Sinembargo e directora ta haya cu compara cu antes tog tin adelanto. E ta comenta cu 20% di localidad cu a wordo cera pariba di brug durante control ta keda “algo preocupante”.
Departamento di Higiena y Inspeccion di Alimento ta percura di cumpli cu nan rol di duna informacion y guia pero esunnan cu ta maneha un supermercado mester wak nan propio responsabilidad. A base di e cifra di nan ultimo control, e departamento ta bay wak cua ta e miho direccion cu nan mester bay ya cu pa nan salud publico ta keda importante.
Sra. Geerman a bisa cu pa nan como salubridad publico ta pone hopi atencion ariba responsabilidad di cada persona y instancia envolvi den e cadena aki pa nan cumpli cu nan rol y responsabilidad. Cada un tin su propio responsabilidad ya sea ta e doñonan di supermercadonan kende mester ta consciente riba ki sorto di producto nan ta bende y e fecha di vencemento pero tambe e distribuido di e productonan mester carga nan responsabilidad pa no bende productonan cu ta cerca pa vence of cu a vence caba.
E ta haya cu si nan por traha conhuntamente y cada un ta cumpli cabalmente cu nan responsabilidad, e trabou ta bira minimo y menos pisa. Y finalmente nan tur ta keda satisfecho pa cumpli cu nan responsabilidad manera mester ta.
