Un demanda nobo ta acusa varios di e companianan tecnologico mas grandi di mundo, di beneficia cu conocemento di muchanan laborando den condicionnan brutal den minanan di cobalt Africano.
E demanda, entrega e siman aki na Washington pa e ONG International Rights Advocates, ta pidi reparacion di Apple, Dell, Microsoft, Tesla y Alphabet, e compania mama di Google.
Cobalt ta un elemento necesario den baterianan recargabel di lithium cu ta podera hopi aparato electronico. E popularidad di smartphone durante ultimo 20 aña a crea un demanda enorme pa e metal, y e popularidad creciente di autonan electrico ta spera di aumenta e demanda mas ainda.
E demanda ta bisa cu companianan ta ‘facilitando e abuso cruel y brutal di muchanan’ den mina di cobalt den Republica Democratico di Congo. E demanda ta enfoca riba un par di compania minero, Glencore basa na Reino Uni, y Zhejiang Huayou Cobalt di China, cual ta bisa ta suministra cobalt na tur e acusadonan.
A entrega e demanda den nomber di 13 persona anonimo, tur famia cu mucha kende a muri of sufri heridanan serio mientras tabata mina pa cobalt.
E demanda ta bisa cu e popularidad di cobalt ‘a trece cune un ola di explotacion brutal’ pa DRC, cual tin un historia colonial sangriento y tabata considera propiedad di rey Leopold II di Belgica. E ta bisa cu centenares di mucha Congoles a ser forsa pa pobresa extremo pa traha den mina, cobando den tunel bou tera cu ekipo primitivo pa apenas $2 pa dia.
Apple a bisa cu ta ‘comprometi profundamente pa haya fuente responsabel di material’ den nan producto, y cu e compania a ‘elimina’ seis refineria di cobalt di su cadena di suministro na 2019 pasobra no a cumpli cu standard di siguridad.
Dell a bisa cu ta investigando e acusacion den e demanda y cu e compania ‘nunca a uza ningun forma di labor inboluntario, reclutamento fraudulento of labor infantil cu conocemento’.
Google a bisa cu ‘labor infantil ta inaceptabel y nos Codigo di Conducta ta prohibi estrictamente e actividad aki’.
