Surfside Science ta un proyecto di Metabolic Foundation pa desaroya metodonan replicable y na un costo abao pa cuminsa monitoria parameternan ambiental clave unda ta haya falta di esakinan. Recientemente nan a tene sesionnan informativo unda a comparti e data cu nan a colecta mediante e proyecto aki.
E proyecto di Surfside Science a cuminsa na 2019 cu sosten di UNESCO, y desde ultimo berano a haya sosten di RESEMBID, cual ta un fondo di Union Europeo. Den e proyecto, nan a haci experimento pa colecta data usando metodonan cu ta replicable – kiermen, otro hende por usa e mesun metodonan pa midi – den areanan manera calidad di awa y aire, y traha mapa di e fondo di lama.
Entre esaki, tambe a midi e cambionan den e asina-yama ‘islanan di rif’.
Islanan di rif ta un barera fisico entre Aruba y lama habri. Nan ta sostene ecosistemanan, provee proteccion natural contra e impactonan di cambio climatico – incluyendo elevacion di nivel di lama, y eventonan di tormenta. Nan ta ser percibi como vulnerable pa cambio climatico pa motibo di nan elevacion hopi abao, tamaño chikito y sedimentonan mobil. Sinembargo, rond mundo e islanan di rif ta hopi valioso y Aruba no ta un excepcion.
Segun e website Birdlife Data, e islanan di rif na Aruba ta representa e unico sitio alternativo pa e Cayenne terns traha neishi na Aruba. Mayor parti di tempo, e Cayenne tern ta dividi mas o menos 70 porciento y 30 porciento entre e islanan di rif na San Nicolas y esnan na Oranjestad.
E babynan di Cayenne tern cu originalmente a registra na San Nicolas Bay a ser observa despues como adulto poniendo nan neishi riba e islanan di rif na Oranjestad. Tambe a observa varios instancia di e mesun parhanan haciendo movementonan multiple, bay bin entre e dos sitio aki, den añanan subsecuente. Hasta 26 pareha di Common tern a pone neishi riba e islanan di rif.
Ademas di parha, tambe ta observa turtuga marino den e awa rond di e islanan di rif, pero no tin evidencia cu nan ta pone neishi riba esaki.
Islanan di rif ta structuranan costeño importante cu ta duna proteccion fisico y ta sostene un red di scosistemanan importante. E trabao di Surfside Science tabatin e meta pa desaroya y test metodonan simple y accesible pa monitor cambio na e islanan di rif, pa yuda informa esfuersonan di conservacion y mehora maneho di costa.
Pa esaki, nan a usa data di satelite di dos manera. Prome, nan a usa man pa trasa imagennan di alto resolucion usando Google Earth Pro. Despues, nan a desaroya codigo pa analisa e islanan aki automaticamente.
E proyecto di Surfside Science a midi e cambionan den area, con compacto y/of fractura nan ta. Nan a observa tur 46 islanan di rif den e costa abao di Aruba durante e periodo entre 2002 y 2022.
Na Aruba, documentonan historico ta mustra cu mayoria di e costa aki tabatin un strip basta continuo di islanan di rif cubri pa mangel, cual no ta e caso mas. Nan resultadonan preliminar ta mustra cu e cambionan aki ta continua, cu e islanan di rif birando cada bes menos y mas chikito, hasta durante e ultimo dos decada.
Ademas di nota cu mayoria di e islanan di rif ta birando mas chikito, tambe a observa cu nan ta birando mas rondo, pues aumentando con compacto nan ta.
Tambe nan a observa cu unda e islanan ta fractura, esaki usualmente ta sucede principalmente na e extremidadnan.
Y mas preocupante, a nota cu un gran cantidad di islanan di rif a parce di a desaparece completamente.
Pa lesa mas tocante e trabao di Surfside Science y tambe pa haya acceso na tur e data cu nan a colecta, por bishita nan website science.brenchies.com.
