Corte Administrativo pa ambtenaar na Aruba a revoca e retiro di Alan Howell, un agente di polis y ex-parlamentario di partido POR. Segun e hues, no mester a dun’e retiro a base disciplinario, pasobra su supuesto malconducta a sucede den su capacidad como parlamentario, no como ambtenaar.
Esaki a keda reporta den un articulo riba portal online, Aruba.nu.
Na augustus di aña pasa, a duna retiro na Howell mediante un decreto nacional, pa motibo di incumplimento grave di su deber. E retiro tabata basa riba un caso criminal, den cual a conden’e di malversacion di fondo publico y di usa documentonan falsifica durante su tempo como parlamentario. Segun ex-minister di Husticia, Rocco Tjon (MEP), Howell a viola confiansa publico y no ta apto pa fungi como agente di polis.
Sinembargo, e corte den su veredicto a indica cu durante su termino parlamentario, Howell automaticamente tabata poni den servicio inactivo como ambtenaar, segun Constitucion di Aruba. Esaki ta nifica cu durante e periodo ey, e no tabatin debernan di ambtenaar y no tabata responde na gobierno den su capacidad di ambtenaar. Pasobra su rol como ambtenaar tabata completamente “suspendi” na e momento ey, no por clasifica su actonan como politico como un malconducta oficial.
Corte tambe a rechasa e base subsidiario pa retiro, basa riba no ta apto. Howell a traha pa polis pa mas cu 18 aña, y segun corte, no tabatin señal cu e tabatin mal prestacion. Ademas, minister Tjon a basa e retiro completamente riba e condena criminal, cual ta bao apelacion ainda. Tanten cu e veredicto no ta final, corte a bisa, no por sirbi como base pa retiro.
E corte a duna veredicto na fabor di Howell y a nulifica e decision di retiro. Tambe a duna orden pa gobierno paga su gastonan legal.
E caso criminal y e retiro como ambtenaar ainda no ta final. Howell a apela contra e veredicto cu a sentenci’e cu un castigo di prison suspendi y un boet. Esaki ta nifica cu corte criminal ainda mester dicidi riba e legalidad di e condena. E retiro como ambtenaar tambe por ta suheto na apelacion.
