Segun CICI, Aruba ta sigui lidera ranking den Caribe cu clima di inversion atractivo

Segun e rapport Caribbean Investment Climate Index (CICI) cu Economisch Bureau Amsterdam (EBA) a publica e aña aki, Aruba ta sigui lidera e ranking den Caribe cu e clima di inversion mas atractivo y Corsou tambe ta posiciona halto den e ranking aki. Esaki ta a pesar di e hecho cu ambos isla a wordo afecta hopi mas fuerte pa e crisis di COVID-19 cu mayoria di e otro islanan den Caribe.

Na 2021 EBA a publica e rapport CICI pa prome biaha. E CICI publica na 2021 a cubri aña 2019 prome cu e brote di e pandemia di COVID-19. Un aña despues, EBA a publica e CICI nobo cu ta tene cuenta cu e efectonan di e crisis di COVID-19 den e clima di inversion. Debi na e falta di disponibilidad di data, e indice no por wordo determina pa Sint Maarten.

E documento ta splica cu CICI ta midi con atractivo e clima di inversion ta na e paisnan di region di Caribe. E ta remarca cu ta importante pa atrae inversionistanan stranhero debi na e escala chikito di mayoria di economianan, e falta di acceso na capital internacional y e dependencia riba importacion di hopi di e paisnan den Caribe.

E indice ta consisti di 16 pais y ta componi pa 18 indicador institucional, economico y financiero cu por haci cu un pais ta mas atractivo pa inversionistanan stranhero. Un puntuacion mas halto di CICI ta refleha un miho clima di inversion. Algun ehempel di indicadornan ta: estado di derecho, apertura di e economia, tarifa di interes, debe publico y participacion laboral, entre otro.

E region Caribense a wordo golpia duro pa e crisis di COVID-19. Hopi pais di e region incluyendo Aruba, Corsou y Sint Maarten, ta depende di turismo como pilar economico, cu a keda paralisa casi completamente na 2020. Di e paisnan cu ta integra CICI, e reduccion promedio di e Producto Interno Bruto (GDP) real na 2020 tabata 12.8%.

Den comparacion, e economia Hulandes tabatin un reduccion di 3.8% na 2020. Aruba y Corsou a wordo afecta mas fuerte pa e crisis di COVID-19 cu e otro paisnan di Caribe.

E rapport CICI di 2022 ta aborda añanan 2020 y 2021 y e efectonan di COVID-19. Na tur e paisnan, cu excepcion di Puerto Rico y Trinidad & Tobago, e clima di inversion a mira un deterioro pa motibo di e pandemia. E rapport ta demostra cu Aruba ainda tin e clima di inversion mas atractivo, a pesar di e golpi fuerte cu e isla a ricibi pa motibo di COVID-19.

E puntuacion CICI di Corsou tambe a cay como resultado di e pandemia. Sinembargo e clima di inversion ta mas atractivo compara cu varios di e otro paisnan den region debi na su institucionnan solido. Corsou ta na di cuater luga den e ranking.

Segun e documento, Puerto Rico y Trinidad & Tobago ta e unico paisnan cu nan puntuacion CICI no a cay. E pandemia tabatin un impacto relativamente chikito riba e economia y ambos pais a logra un crecemento economico negativo e añanan prome cu e pandemia a cuminsa. Nan crecemento apenas a wordo afecta pa e pandemia.

Pa loke ta trata e desaroyo di e clima di inversion, na 2022 esaki ta relaciona na e medidanan den cual e paisnan por recupera economicamente di e efectonan di e pandemia. Varios pais, incluyendo Aruba, a mustra un recuperacion economico fuerte na 2021 como resultado di un aumento significativo di turismo compara cu 2020. Sinembargo, e desaroyo di turismo ta permanece incierto despues di e crisis di e pandemia. Ademas ta existi e incertidumbre pa e aumento di inflacion riba nivel mundial y e guera na Ucrania.

E tarifa di interes tambe por representa un menasa serio pa e clima di inversion. Segun CICI ta señala, ta importante pa Aruba y Corsou reduci gradualmente e debe publico. Cu e aumento di e tarifa di interes, e desplazamento di inversion publico lo aumenta, manera por ehempel den educacion y infrastructura. Esaki mientras ta exigi un necesidad di inversionnan den ambos area.

Adicionalmente, e documento a subraya, mester acelera e ritmo di e reformanan economico den e contexto di e landspakketnan y e agendanan di implementacion. E ta agrega cu na Corsou, y den medida mas chikito na Aruba, tin un buraco grandi di produccion y un potencial economico sin explota. Pa cambia e rumbo economico, mester acelera e ritmo di implementacion di e reformanan. E prioridad y conexion di e diferente reforma- y medidanan ta esencial den e aspecto aki.

Por ultimo e rapport ta destaca cu e disponibilidad di data di Aruba, Corsou y Sint Maarten, ta limita y e datonan di Sint Maarten ta hopi mas limita pa calcula un puntuacion CICI. E importancia di miho data pa un bon formulacion di politica a wordo enfatisa durante añanan. Ademas e datonan ta esencial pa midi y monitorea e efectonan di e reformanan den e contexto di landspakketnan.