Segun CEO di AHATA, Tisa LaSorte: ‘Diversificacion pa atende cu posibel caida di economia Mericano’

AHATA como un asociacion cu ta representa e sector hotelero na Aruba tabata presente durante e di 35 conferencia di ATCA organisa pa Oficina di Turismo (ATA) pa e socionan di Norte America.

Segun CEO di Aruba Hotel and Tourism Association (AHATA), Tisa LaSorte, e conferencia anual aki ta masha importante considerando cu un 73% di nos turismo ta bin di Merca y Canada. Den e conferencia aki ta wordo invita nos partnernan di nos industria turistico cu ta bende nos producto turistico, entre nan nos hotelnan, actividadnan, etc.

ATCA ta bira un escenario ideal -segun CEO di AHATA- pa mustra nos partnernan di Nort America kico Aruba tin di ofrece. Mester ta consciente cu afo tin hopi competencia y tin hopi producto nobo ta habri actualmente den nos region Caribense, entre otro, hotelnan nobo cu ta habriendo. Door di esey, nos industria turistico mester tin e momento oportuno pa sigura cu nos partnernan di Nort America sigui corda riba Aruba. “Cu Aruba tin cosnan nobo di ofrece,” el a bisa.

Aunke nos ta un producto madura y nos tin hopi aña den turismo, nos ta keda renoba y keda bin cu ideanan nobo pa nan keda cu un tipo di expectativa pa sigui bende nos producto. Encuanto e posibilidad di un recesion of des- aceleracion di Merca su economia, AHATA ta sigui di cerca e desaroyo aki. Segun LaSorte, semper e asociacion aki ta keda pendiente di kico por cambia den e mercado importante aki.

Un aspecto cu el a trece dilanti durante e conferencia di ATCA ta, cu aunke Aruba tin un par di aña exitoso, nunca nos no mester ta kere cu nos ta sigui exitoso. “Semper nos ta keda traha duro. Semper nos mester wak kico por bin negativo pa nos por ta prepara p’e,” el a bisa.

Diversificacion

E ta haya cu e miho manera pa nos prepara den caso di un caida chikito den e mercado di Merca ta e diversificacion. Si algo pasa den un mercado, nos por pidi otro mercado pa hiba su cantidad di bishitante pa nos. AHATA ta traha hopi estrecho cu ATA riba strategia di mercadeo pa por ehempel nan por desaroya Europa mas.

“Nos tin hopi pais na Europa cu tin hopi oportunidad pa crece pa e demanda pa Aruba,” el a bisa. Ta importante pa diversifica den e tipo di mercado cu ta interesa den nos producto turistico y asina purba crece e demanda, y en caso cu tin problema den un pais bo por bira bay e otro pais.

Un ehempel cu el a trece dilanti y cu Aruba a haci exitosamente, ta ora cu Venezuela, cu tabata nos di dos mercado mas importante den turismo, a cay. Esaki a haci cu nos a bay mas fuerte riba mercado di Merca mas y ‘habri e cranchi un tiki mas di Merca.’ E ta kere cu nos por sigui e mesun ehempel aki na Europa y otro luga.