Venezuela ta un di e paisnan mas cerca di Aruba cu actualmente ta den e lista di 14 pais cu brote di Zika. Esaki ta particularmente alarmante pa Aruba mirando e cantidad di turista cu nos ta ricibi diariamente. Ta importante pa ta consciente di e peligernan cu un posibel biahe pa e pais tambe lo por tin pa e hende muhe na estado of cu ta purbando di sali na estado ya cu por tin conexion cu e virus Zika y defecto na cabes y celebro di e baby.
Cu cantidad di evidencia cu ta mustra cu e virus Zika ta responsabel pa e cantidad aumentando di defecto di nacemento na Brazil, Centers for Disease Control and Prevention (CDC) a manda un alerta pa tur persona na estado of cu ta plania pa bira na estado pa wanta un rato cu nan biahamento pa paisnan Latino Americano y Caribe y otro teritorionan experenciando epidemia di Zika.
Paisnan cu brote
“Tanten cu nos sa mas, y cu hopi cautela, CDC ta recomenda precaucion,” e agencia a bisa. E 14 paisnan inclui den e advertencia ta Brazil, Colombia, El Salvador, French Guiana, Guatemala, Haiti, Honduras, Martinique, Mexico, Panama, Paraguay, Suriname, Venezuela y Puerto Rico.
Condicion fatal
E ta e prome biaha cu CDC ta recomenda pa hende muhe na estado specificamente evita cierto areanan. Expertonan di salud na e agencia a haya e precuacion aki hopi necesario despues cu nan a haya evidencia nobo cu ta indica conexion directo di e virus y microcephaly, cual ta condicion cu baby nan ta nace cu cabes y celebro abnormalmente chikito, un condicion fatal.
Brazil a raporta su prome caso di ZIka na mey 2015 y desde e fecha ey autoridadnan ta calcula cu entre 500 mil te cu 1.5 miyon hende a haya e virus. E pais a mira un aumento di mas di 20 biaha di casonan di microcephaly. E defecto aki generalmente ta uno hopi scars y ta wordo causa pa factornan genetico door di a wordo exponi pa kimico toxico of cierto infeccion cu ta inclui rubella y bruela.
Mientrastanto expertonan ta buscando tur manera pa sali for di e epidemia di Zika aki. E sangura cu ta transmiti e virus aki ta e mesun sangura cu ta transmiti Dengue y Chikungunya y te cu aworaki no tin ningun tratamento specifico of vacuna contra Zika. 1 den cada 5 hende infecta cu Zika ta bira malo, pues desaroya Zika. E sintoma di mas comun ta keintura, rash, dolor di joints y wowo cora (conjunctivitis), otro sintomanan tambe ta dolor di musculo y dolor di cabes. E malesa usualmente ta leve cu sintomanan cu ta dura pa algun dia of un siman, den caso severo ta rekeri asistencia na hospital, cual no ta comun pa e virus aki y morto no ta comun.
Durante di e prome siman cu un persona ta infecta, e virus Zika por wordo haya den sanger y por wordo transferi door di un pica di un sangura cu e ora ta wordo infecta cu e virus, y ta pica otro persona dunando e persona e virus. Pues un sangura infecta por plama e virus pa otro persona.
Informacion obteni for di CDC
