Segun e Caribbean Climate Outlook Forum (CariCOF) a informa, e temporada di calor e aña aki na e islanan di Caribe no lo ta mesun intenso compara cu esun di e ultimo dos añanan.
E portal internacional News Room a reporta cu e Caribbean Climate Outlook Forum (CariCOF) cu sede na Barbados, ta bisa cu un temporada di calor den Caribe probablemente lo cuminsa tuma luga desde luna di april y cu esaki lo aumenta gradualmente, pero asina mes probablemente e temporada di calor e aña aki no lo iguala esunnan di aña 2023 i 2024.
Den su ultimo Perspectivanan di Clima di Caribe pa e proximo periodo di april te juni,cu a ser publica dialuna ultimo, a bisa cu esaki ta debi na e condicionnan neutral di fenomeno El Niño Southern Oscillation (ENSO) den e pacifico, combina cu awanan inusualmente cayente rond di Caribe y awanan temporalmente mas friu den e parti noordoost di Atlantico Tropical oriental.
CariCOF ta pronostica tambe cu den luna di april, tasanan halto di evaporacion, periodonan frecuente di secura cortico y acumulacion di cualkier secura continuo ta aumenta e potencial di candela di mondi.
CariCOF ta bisa cu, cu excepcion di Aruba, Boneiro y CorsoU cu den mayoria ta seco, e intensidad di awasero y frecuencia di awasero mester subi yegando luna di mei na Bahamas, Guyana y Antia Grandi, of luna di juni na Belize y Antia Menor “resultando den un potencial halto pa sumamente halto pa inundacion, inundacion repentino (flash flooding) y impactonan asocia.
“Episodionan di intrusion di stof di Sahara probablemente lo ta frecuente; mas frecuente esakinan ta, mas seco y calor, y mas eratico e ocasion di clima severo,” CariCOF a agrega.
Den su ultimo situacion di secura, CariCOf a bisa cu secura modera, of pio, di termino cortico a desaroya den e parti central y noord di Bahamas, e Islanan Cayman, partinan di St Croix, Sint Maarten y St Bart’s.
A bisa tambe cu secura a largo plaso ta evolucionando den parti zuid di Belize, parti noord di Republica Dominicana, zuidwest di Jamaica, St Bart’s, St Vincent, zuidoost di Surinam y noordoost di Trinidad.
