Segun CAft, mester adapta presupuesto pa incorpora eliminacion di recorte di 5.5% den cuido

Recientemente, CAft a duna comentario na portal online NoticiaCla tocante eliminacion di recorte den sector di cuido. CAft a expresa cu mester refleha esaki den un presupuesto adapta.

E Colegio di Supervision Financiero a reacciona na e decision di gobierno di Aruba pa elimina e recorte di 5.5% den sector di cuido di salud, indicando cu e decision aki, sin cu tin medidanan di compensacion, lo conduci na perdida di spaartmento di gasto y por lo tanto ta bay afecta e resultado di AZV, segun a indica na NoticiaCla e siman aki. Gobierno a bisa cu a informa CAft y gobierno di Hulanda di e decision pero ta wardando reaccion di CAft. CAft a indica cu por spera un reaccion pa proximo siman. Tampoco ta conoci si tin un reaccion di Hulanda.

Segun minister di Salubridad Publico, Dangui Oduber, no tabatin base legal ni hustificacion pa mantene e recorte. Dia 2 di mei ultimo, Oduber a señala cu finalmente a yega ora pa stop e recorte di 5.5% y duna esey back na trahadonan den sector di cuido. E recorte tabata un imposicion di Hulanda tempo cu pandemia di Covid-19 a cuminsa na Aruba na aña 2020, como condicion pa ricibi sosten di likides.

Oduber a indica cu na januari di e aña aki nan a reuni cu e presidente nobo di CAft, Lidewijde Ongeringen, ken segun minister Oduber a mustra un apertura den e sentido di mas comprension pa e situacion cu Aruba ta aden, y a aplaudi e hecho cu AZV ta haciendo e reformanan necesario pa maneha gasto. “Nos ta den un situacion cu comunidad no ta asina saludabel y e presion riba gastonan medico ta continuo. Den dies aña di tempo nos poblacion riba 65 aña a aumenta den 10% pa 20%, esaki ta ilustra e presion cu tin riba e fondonan, pa mantene e seguro sostenibel y e paketenan di seguro pa nos aseguradonan.”

Minister Oduber a indica cu a splica CAft cu Aruba tin un plan pa futuro cu ta demostra con lo maneha e gastonan di cuido. E deseo ta pa para e recorte di 60 miyon florin y bay over na un perspectiva di un plan multianual.

E mandatario a sigui bisa cu gobierno di Aruba ta preparando un estimacion di e plan multianual pa asina fin di luna di juni 2023 comparti esaki cu CAFT. Den esaki Aruba ta bay haci uso di un economista specialisa den cuido cu lo bay yuda cu tur e calculonan necesario.

Sinembargo, den su reaccion na NoticiaCla, e Colegio di Supervision Financiero a a bisa cu mester incorpora e consecuencia presupuestario di e eliminacion di recorte di 5.5% den un presupuesto adapta. “CAft e ora lo evalua e codigo civil di conformidad di e ley integralmente (Ley di Supervision Financiero y Protocol)” pa sigura cu gobierno ta actuando segun reglanan stipula.