E ‘bond trustee’ (entidad cu ta custodio di bono) pa Venezuela su empresa estatal PDVSA ta lagando inversionista den scuridad encuanto e status di un pago crucial cu mester a ser haci dia 27 di october, siman pasa.
Mitsubishi UFJ Financial Group, e trustee pa e bononan cu ta madura na 2020, a conta inversionista cu nan lo no provee algun informacion tocante e status di e nan fondonan, te ora nan emiti un declaracion den e dianan venidero, di acuerdo cu hende cu conocimento di e asunto, cu a pidi Bloomberg pa no revela nan identidad pasobra e conversacionnan tabata priva.
Tom Hoagwood, un vocero di MUFG, a nenga di comenta, bisando cu lo ta inapropia pa e banco discuti cualkier corespondencia cu e tin cu PDVSA.
Mientras cu PDVSA a bisa cu riba e fecha di vencimento e US$842 miyon a ser manda, terminando dianan di speculacion tocante si e compania petrolero lo por default, e inversionistanan cu tin bono no a mira placa riba nan cuenta. No tabatin comunicacion di parti di e compania o di gobierno desde cu siman pasa nan a declara cu nan a haci e pago, “a pesar di e sancionnan ilegal y ilegitimo” imponi riba nan pais pa Merca. Na luna di augustus, gobierno di Trump a bolkea compra di debe o propiedad nobo emiti pa Venezuela y PDVSA, pero no tin actualmente restriccion riba transaccion cu mayoria di debe existente.
Interogante cu ta rondona e status di e pago ta trece tambe duda encuanto e pago cu PDVSA mester haci mañan, diahuebs, di US$ 1,1 biyon. E bononan cu ta madura e fecha ey a cay e siman aki 1.8 cent te 94.18 cent.
Si e bononan keda tres dia di negoshi sin pago, e inversionistanan por pidi e International Swaps & Derivatives Association pa determina cu a sucede un ‘credit event’ loke por causa cobransa di como US$ 250 miyon na garantia di PDVSA.
