ORANJESTAD – Durante e siman aki cu Parlamento ta tratando e diferente presupuesto di pais Aruba -entre nan esun di Ministerio di Infrastructura a wordo trata ayera- caminda fraccion di oposicion ta haya cu mas medida tin den dje.

Ex Minister di Infrastructura y actual Parlamentario, Benny Sevinger (AVP) a indica cu tempo cu e tabata defende su presupuesto, e tabata presenta cu un lista largo di proyectonan na beneficio di comunidad cu Gobierno anterior a cuminsa ehecuta manera Green Coridor, Watty Vos Boulevard, embeyecemento di area residencial, 4 mil mata planta, linear park, rotonde, alternativa pa alivia e trafico drechamento di nos barionan, etc… Pues e ta haya cu nan tabata cosnan positivo pa nos comunidad.

Awor cu nan a trata e presupuesto di infrastructura, cuater pagina so e mandatario a entrega di su maneho pa 2019. Den dje e ta papia di reforma ROP; mas participacion na parke marino; introduccion tarifa pa recoge sushi, privatisa kadaster, reorganisa DIP. Parlamentario Sevinger ta haya cu e presupuesto di su sucesor, Minister Otmar Oduber, no tin niun proyecto plania pa nos comunidad pa 2019.

E ta pone su “man den su curason” ya cu los di tur e medidanan cu comunidad ta bay haya extra otro aña, tampoco tin inversion riba proyecto. El a indica cu den e presupuesto aki no tin niun scol cu ta wordo renoba; y menos scol nobo traha. Careteranan cu ta wordo asfalta ta careteranan cu Gobierno anterior a laga atras, segun e ex Minister di Infrastructura.

Inversion y crecemento economico
Parlamentario Sevinger ta preocupa riba situacion di nos comunidad, ya cu durante e añanan nan a wordo suta cu medidanan pa supuestamente paga mega debe, mientras cu CAft ta confirma cu Gobierno di coalicion no a paga niun debe, sino cu mas bien Gobierno a hisa e debe cu e placa cu nan a cobra extra for di nos comunidad.

E maneho aki a haci, segun Parlamentario Sevinger, cu inversionistanan para nan proyectonan, cu comercio ta bayendo atras y cu pais Aruba ta den un recesion economico. El a indica cu segun dato di Banco Central, nos pais tabatin un crecemento economico di 2.3% na aña 2017 y aworaki e ta 0.5% negativo y e por ta mas abou ainda. El a agrega cu si un salbacion cu nos economia no ta cay mas abou esaki ta debi na e proyecto di hospital y Watty Vos Boulevard cu ta andando.

“Banco Central ta mas preocupa cu nos. Pasobra ta cosnan cu nos a laga atras andando cu nan a purba para y cu te ainda nan ta investigando supuestamente pa cera gobernantenan anterior, ta esunnan cu probablemente ta scapa…,” el a bisa. Sinembargo e Minister di Infrastructura, dunando su contesta riba preguntanan formula den Parlamento, a laga sa cu un proyecto cu lo cuminsa entrante otro aña ta St. Regis hotel cu lo contribui pa genera actividad economico.

Tambe el a indica cu e maneho pa bay den direccion di belasting directo pa indirecto pa medio di e reforma fiscal, e prome fase di e reforma aki ta laga mas placa den man di pueblo. Esaki lo crea un poder di compras cu por surpasa loke a wordo conoci durante e ultimo añanan. Ya cu entre 8 mil pa 9 mil hende adicional no lo paga loonbelasting. Tambe Gobierno lo cuminsa coregi e situacion financiero na un forma stabiel.