(AP) – Mas cu 140 drone Ucraniano a ataca varios region na Rusia, incluyendo e capital Moscu y areanan rond durante anochi di dialuna ultimo, matando por lo menos un persona y heridando ocho, autoridadnan a bisa ayera, den un di e atakenan mas grandi riba tereno ruso.
Un muhe a muri den e estado di Ramenskoye, pafo di Moscu, caminda drone a dal dos edificio residencial di varios piso y a cuminsa un candela, gobernador di e region di Moscu, Andrei Vorobyov, a bisa. Cinco edificio di apartamento cerca di un di e edificionan daña a ser evalua debi na e restonan di drone cu a cay, Vorobyov a bisa.
E ofensiva Ucraniano a pone autoridadnan cera temporalmente tres aeropuerto pafo di Moscu: Vnukovo, Domodedovo y Zhukovsky. Un total di 48 vuelo a ser desvia pa otro aeropuertonan, segun e autoridad Ruso di aviacion civil, Rosaviatsia. E aeropuertonan di Vnukovo y Domodedovo a reanuda su operacionnan den oranan di mainta, pero e di tres a keda cera den oranan di atardi mientras cu e restonan di e dronenan a ser saca, un vocero a bisa e agencia estatal di noticia Interfax.
Tabata e di dos atake grandi cu drone di Kyiv riba Rusia e luna aki. Dia 1 di september, ehercito ruso a bisa cu nan a intercepta 158 drone Ucraniano riba un dozijn di provincia, den loke medionan local a yama e ofensiva Ucraniano di mas grandi di su tipo for di inicio di e guera. Comite di Investigacion di Rusia a anuncia e apertura di un investigacion criminal riba loke nan a describi como un atake terorista.
Rusia, di su parti, a bombardea Ucrania cu misilnan, bombanan di glider y su propio drone den ofensivanan cu a costa bida di mas cu 10.000 civil, segun Nacionnan Uni. Ucrania a inverti hopi esfuerso den desaroyo di produccion domestico di drone, ampliando nan alcance, carga util y uso.
Cada bes mas, ta usando ofensivanan di drone pa disminui e uso mashin di guera Ruso, pa atemorisa e poblacion Ruso y provoca e Kremlin.
Autoridadnan Ucraniano a keha cu armanan priminti pa nan aliadonan Occidental no ta cumpli cu e necesidadnan di nan militarnan y hopi biaha ta yega hopi mas laat cu priminti. E presidente di e pais, Volodymyr Zelenskyy, a pidi companianan di defensa pa aumenta nan produccion.
Riba e frente di bataya, cu ta extende na 1.000 kilometer (600 miya), trupanan Ucraniano ta enfrenta un ehercito Ruso miho ekipa y mas grandi. E dos parti ta bringando specialmente pa areanan di e provincia oriental di Donetsk, caminda nan ta bringa pa estadonan y pueblonan cu ya caba ta ruinanan bombardea. Di su banda, Kyiv a lansa un incursion riesgoso den e region di frontera Ruso di Kursk luna pasa.
Na Mosku, e restonan di un drone a cay dialuna anochi riba un cas priva sin laga ningun persona herido, segun alcalde Sergei Sobyanin. Segun e consehero, mas di un dozijn di drone cu tabata bayendo direccion di e ciudad a ser tumba pa defensanan anti-aereo.
