Mensensmokkel, traficacion di persona ta un termino usa unda ilegalmente y di forma organisa ta trafica persona a traves di fronteranan internacional y no solamente e ta castigabel na nivel internacional sino na Aruba tambe, unda e ta hancra den Art. 2:154 di Codigo Penal di Aruba. Den esaki e castigo por varia di 4 aña di prison, multa di categoria 4 te cu 15 aña di prison of multa di categoria 5 si e trafico di persona tin como resultado e morto di e persona.
Leidy Yohana Salazar de Moreno
Salazar de Moreno a disparce na luna di maart ora el a sali cu boto for di Puerto Escondido cu destino Aruba. Prome informe cu a sali tabata indica cu nunca el a yega Aruba y e na e momentonan aki, ainda e ta desapareci.
Funcionarionan di CICPC na Venezuela cu tabata realisa un patruyahe cibernetico por medio di un website a haya sa di e desaparicion di Salazar, na unda nan a cuminsa e investigacionnan corespondiente cu entrevista y analisis telefonico. Den esaki, nan a logra e identificacion y detencion di 5 persona di Venezuela y a saca un orden di captura pa e Arubiano R. Stamper, kende tabata capitan di e boto cu a busca Salazar y a crusa frontera internacional di Venezuela pa Aruba ilegalmente. Den e investigacion penal, otro nomber di R. Laveist a cay den e analisis telefonico, segun fuentenan cerca di e investigacion na Venezuela.
Declaracion di R. Laveist na diferente medio
Diaranson ultimo, e Arubiano R. Laveist a confesa publicamente den diferente medio local cu el a haci un prome intento di busca Salazar na januari, pero esey a fracasa. Tabatin palabracion, plan y transaccion financiero pa trece Salazar Aruba.
Laveist a conta cu na januari el a haya un yamada di un persona cu alias “Fiqui” ken a puntra si Laveist por busca Salazar na Venezuela. Despues di 1 siman nan a topa otro dilanti un restaurant na Playa y segun el a sigura, nan a haci un areglo pa busca Salazar dia 19 di januari. E prome intento pa busca Salazar a fracasa unda Laveist ta bisa cu e si a sali pa bay Venezuela, pero e otro personanan nunca no a yega, pa motibo cu lama tabata hopi bruto y segun Laveist a sigura, practicamente e la perde su biahe. A pasa 2 luna cu Laveist a dicidi e no por busca Salazar mas debi cu el a fractura su columna y e no por a core boto mas.
Den esaki, el a bisa cu R. Stamper ta e persona cu a busca Salazar na mita di caminda unda e boto di Venezuela a topa cu R.Samper, y Salazar lo a bula for di boto pa motibo cu Kustwatch casi tabata intercepta e boto.
Declaracion di R.Stamper
Bon Dia Aruba a purba tuma contacto cu Stamper diamars ultimo 25 di april pero el a nenga di duna un declaracion na nos redactor. Di otro banda, Bon Dia Aruba a sigui investiga y a haya un audio den cual Stamper ta declara cu su prome contacto cu Salazar tabata den awa teritorial di Venezuela, na unda pa evita cu Kustwacht por a wak nan cu radar di Aruba ora nan tabata haci contacto cu otro, nan a tira Salazar cu un boei blauw na awa pa despues Stamper por pasa y pikie.
Ora Stamper a pikie for di lama el a wak caba “cu Johana no por landa. Ora m’a carg’e y hink’e den mi boto.”
Despues el a conta cu nan a coy direccion pa Aruba –Johana cu Stamper nan so den e boto – e tabata sa caba cu Kustwacht tabata wardando riba nan unda su boto semper ta para den Colony.
Segun el a sigura, Salazar a bula for di boto 100 meter for di Baby Beach. E ta e ultimo persona cu a wak Salazar cu bida y te na e momentonan aki e ta desapareci.
