Aruba Tourism Authority ta un entidad cu tin e reto di ricibi hopi peticion di deportistanan na unda CEO di e instancia aki, Ronella Croes a sigura cu si ta pa nan, nan ta asisti tur caminda pero lamentablemente ta existi un maneho.
Na Aruba comunidad por mira cu algun deportistanan ta para na cierto camindanan den oranan di dia cu hopi calor y solo pa pidi placa y asina nan por haya mas recurso pa nan actividadnan of biahenan na unda nan ta representa Aruba mes den exterior, pa cu esaki, Croes a sigura cu maneho ta dirigi na eventonan cu ta na e isla mes, cu ta cerca di e metanan legal di ATA.
ATA ta encarga cu promocion di Aruba na nivel internacional, atraccion di turismo y tambe atraccion di e placa cu tur e turismo ta genera pa Aruba, esey ta nan metanan principal, tambe tin otro aspectonan pero tur tin cu bay na e metanan aki.
Den eventonan aki nan tambe ta duna na cierto atletanan e oportunidad pa nan competi den diferente aspecto cu atletanan internacional tambe den un asociacion cu nan a haci cu Comite Olimpico Arubano, el a splica cu ta uno special pa motibo cu esnan cu ta bay afo ta embahadornan internacional y kico ATA por haci eynan, na unda nan lo enfoca riba atletanan cu ta yega na nivel olimpico.
“Lamentablemente esey ta un linea cu bo tin cu pone, pasobra si ta pa nos, nos kier duna aporte na tur pero nos mester scoge nan,” el a bisa.
El a menciona cu na e momentonan aki ta den dialogo cu Gobierno di Aruba, pa medio di minister di Deporte, Endy Croes, pa papia di un posibel asociacion entre gobierno, Ministerio di Deporte, ATA y Lotto pa Deporte pa crea un maneho unda cu por brinda cierto asistencia, ta algo cu no a wordo concretisa ainda pero ta sirbi como ehemplo di otro manera unda cu den asociacion cu otro partidonan lo por mira ki eventonan of maneho por bin cune cu ta cuadra cu maneho di ATA tambe, cu ta wordo stipula pa ley.
“E ta un luz cu ta cendi y nos ta den dialogo cu gobierno pa wak kico por haci eynan den cual Lotto pa Deporte y Ministerio tambe lo ta eynan,” Croes a sigura.
