Oficina di Turismo di Aruba (ATA) ayera mainta a duna informacion tocante su rapport anual 2023 e cual a presenta na minister di Turismo siman pasa conforme ley y e ta bay tambe na Parlamento di Aruba, unabes cu minister bay di acuerdo cu e rapport, Parlamento tambe tin oportunidad di haci pregunta of duna comentario.

Asina Ronella Croes CEO di Ata a splica ayera mainta den un conferencia di prensa unda tambe a señala cu aworaki nan ta den spera di e feedback di e minister di Turismo Dangui Oduber, igualmente nan a haya prudente pa duna informacion di kico ta e resultadonan di 2023 y con a bay cu ATA como instituto.

Na 2011 ATA a bira un organo independiente unda nan a converti Aruba Tourism Authority un sui generis, loke ta nifica cu nan ta independiente den esfera publico y nan ta un entidad unico mirando nan tarea y nan responsabilidad, entre otro e mercadeo internacional pero tambe e hecho cu nan tin oficinanan den exterior, como ehemplo na Merca, Colombia y Hulanda, loke no ta usual pa un organo di esfera publico.

“Mester tene na cuenta cu Aruba ta haya promocion den mas o menos 15 diferente pais y den cada pais, bo tin inversion como tal y bo tin representacion tambe, esaki ta haci di ATA unico y diferente cu un responsabilidad basa internacionalmente tambe,” Croes a sigura.

Croes a compara e etapa di turismo di aña 2023 cu esun di aña 2011 ora ATA a bira un entidad aparte, e parti mas importante ora ta trata exito di turismo conforme maneho di turismo, e indicador primordial ta loke nan ta yama Turism Receipts e cual ta registra y combina pa Banco Central di Aruba, e ta parti di e cuentanan nacional di Aruba y ta hopi importante, pa motibo cu ta e entrada directo pa medio di turismo.

Di e 4.7 biyon florin cu turismo a genera den tourism receipts aña pasa, si nan ta compar’e cu e cifranan cu nan a mira na 2011 por conclui e ora ey cu tourism receipts a subi cu 94%, un señal hopi fuerte segun Croes a señala y esey ta un di e tareanan principal di ATA, den e parti di calidad vs calidad, tourism receipts ta papia di calidad.

Pa loke ta trata e cantidad di bishitantenan di aña pasa cu a yega Aruba via avion compara cu aña 2011, por conclui cu a registra un crecemento di 43%.

Den e dos indicador aki, ta nifica cu e tourism receipts su crecemento di 2023 compara cu esun di 2011 ta practicamente dobel di lo cual ta e volumen cu a bin cu avion a crece, 94% vs 43%.

Mas informacion di e rapport aki den edicion di Bon Dia Aruba di mañan diaranson.