Segun Association of Aruban Realtors (AAR) agentenan di real estate no ta responsabel pa prijsnan halto di vivienda na Aruba

Durante e rondanan di consulta cu formadornan, Gerlien Croes y Mike Eman, ta hibando como parti di e proceso di formacion di gobierno, nan a reuni cu e Association of Aruban Realtors (AAR). Jennifer Figaroa miembro di e directiva di e asociacion a splica kico tabata e puntonan di prioridad cu a bin dilanti durante e reunion.

Figaroa a indica cu e reunion a bay hopi bon ya expresa cu nan ta contento di por a reuni cu e formadornan. El a splica cu tabatin varios punto di importancia cu nan a kier a trece dilanti, pero pa motibo di e tempo cortico a enfoca riba dos punto cu ta cardinal pa e asociacion.

Un di e puntonan aki ta e profesionalisacion di e real estate brokerage na Aruba. Figaroa a splica cu e industria di realestate ta un industria cu ta esencial y cu ta yuda e economia di Aruba. El a menciona cu no solamente nan ta fungi como intermediario den e transaccionnan entre e cumprador y bendedor, pero tambe hopi importante, el señala, nan ta “gate keepers” di e sistema financiero

El a indica cu no obstante cu nan ta cay bou di supervision di Banco Central di Aruba y cu nan ta cumpli cu tur e regulacionnan, el a expresa cu nan ta sinti cu e por bay miho.

Figaroa a splica cu relaciona cu e punto aki a trece dilanti cu aworaki e framework, e proceso cu tin pa bira un agente di real estate ta hopi facil, locual ta haci cu, segun el a sigui splica, pa e personanan cu di berdad ta inverti tempo, placa, educacion y preparacion pa duna un servicio excelente na e clientenan, e ta baha e balor pasobra e ta simplemente mucho facil pa bira un agente di real estate.

Durante e reunion, el a indica, nan a trece e punto di enfoke aki dilanti y a duna recomendacion di kico por haci pa mehora e aspecto aki, manera por ehempel implementa un licencia pa bira un agente di real estate.

Banda di esey e asociacion a trece dilanti un tema cu ta hopi presenta y actual den comunidad, cual ta e tema di vivienda accesibel pa famia- y/of personanan di clase media.

Esaki ta un fenomeno cu ta andando pa hopi tempo caba. Fiagora a remarca cu ta un hecho cu casnan ta caro y nan como agentenan di real estate ta ser culpa di aumenta e prijs di casnan den mercado, locual el a sigura cu no ta corecto. “Aworaki mescos cu nos tin un escasez nacional den labor, nos tin un escasez den casnan y esaki ta tres mil na unda 200 so ta ser construi pa aña.

El a splica, como ehempel, cu aworaki pa traha un cas di 100 vierkante meter e ta costa 2,700 florin pa vierkante meter cu ta pone cu e cas lo cas lo tin un costo di 270 mil florin, sin conta e tereno. El a indica cu terenonan tambe ta caro y no tin tereno eigendom, locual ta bin cu ‘vraag en aanbod’. El a sigui splica cu terenonan aworaki tin un prijs di entre 500 y 600 florin pa vierkante meter locual ta haci e ora cu si un persona cumpra un tereno di 300 vierkante e por sali, si rond af bay ariba, 200 mil florin.

Na final cumpra of traha un cas di 100 vierkante meter lo por costa alrededor di 500 mil florin.

El a agrega cu e persona aki dicidi cu aki dos aña e kier bende su cas, nan no por bis’e pa na ki prijs e mester bende su cas.

Ademas, el a indica, cu no solamente e factornan ey ta hunga un rol. El a menciona cu costo di bida tambe ta caro y costo haci negoshi ta hopi caro cu ta haci cu e construccion di un cas ta bira caro tambe.

“Nos ta hopi contento cu nos a bin y nos ta akinan pa e pueblo. Nos ta akinan pa guia, pa duna conseho y p’esey pa nos ta hopi importante pa sigui educa nos mes pa asina por duna e servicio optimal cu e ciudadano mester pasobra cumpra un cas y bende un cas ta algo sumamente importante. E ta algo cu ta bin cu emocionnan y bo mester ta completamente ekipa como consehero pa por guia e persona ey,” el a indica.

Por ultimo, contestando pregunta di miembro di prensa tocante e tema di casnan cu ta ser cumpra pa stranheronan of ta ser transforma den AirBNB, Figaroa a splica cu a toca e tema, pero den detaye, pasobra otro gremionan ta papia di dje.

El a indica cu en berdad hopi cas ta ser bendi cu stranhero, pero el a señala cu esaki ta casnan riba 600, 700 of 800 mil dollar cu fuera di e alcance di un famia di clase media. El a agrega cu ta algo cu ta sucediendo y a expresa cu reglanan mester bin pa yuda den e aspecto aki. “Esey nos ta consciente y ta para su tras, ta djis mester yega na mesa y wak con e regla aki ta ser hinca den otro pasobra na final di dia, nos ta biba di e turismo,” el a finalisa.

No ta un secreto cu cada biaha mas y mas propietario di casnan ta scoge pa drenta den e negoshi di huur nan propiedad como vacation rental. Inicialmente e fenomeno aki tabata sucede na cierto partinan di e isla, por ehemplo Palm Beach cu ta e area turistico, pero esaki a bin ta expande y aworaki propietarionan di cas na tur parti di e isla ta prefera di no huur nan propiedad na localnan pa tempo largo, pero mas bien pone nan cas disponibel pa turistanan.

Scarsedad di vivienda ta un problema hopi presente y grandi, apart di un otro problema cu ta biba den comunidad, cu ta e prijsnan haltisimo di e casnan disponible pa huur, y pa cumpra, ya cu prijsnan aworaki ta lista na dollar, y no na florin. Mester agrega na lista aki tambe e problema di casnan di vakantie cu ta opera di forma ilegal.

Vivienda ta un di topiconan cu durante eleccion a ser treci dilanti pa tur partido politico como parti di nan preocupacion y un punto pa mehora. Expectativa di hopi ciudadano ta riba gobierno nobo pa mira si nan ta aborda e problematica aki di un punto di bista diferente y si en berdad nan lo trece cambio pa ciudadanonan, hobennan, cu tin e deseo di un dia por tin un cas propio por yega na esaki.