Segun Apple empleado a co-inventa tecnologia den disputa cu Qualcomm

ESTADONAN UNI – Apple a bisa diamars cu un di su ingenieronan a contribui na un patent, cual Qualcomm ta bisa e fabricante di iPhone a infringi, un twist den e disputa legal andando entre e dos compania.

Apple a bisa cu e concepto tras di e patent, cu ta permiti un smartphone conecta na internet rapidamente unabes e aparato cende, a wordo proponi pa Arjuna Siva, kende a traha pa Apple prome cu e lansamento na 2011 di e prome iPhone cu a uza un chip di Qualcomm. Apple, kende a bisa Siva mester wordo nombra riba e patent, a argumenta e punto durante e segundo dia di un huicio na corte federal na San Diego.

Qualcomm ta demandando Apple den corte federal tocante tres patent registra na Qualcomm, cual e compania ta bisa Apple a infringi. E huicio ta un frente den un bataya legal amplio entre e dos gigantenan di tecnologia. Dos aña pasa, e Federal Trade Commission (FTC), cu ayudo di Apple y Intel, a acusa Qualcomm di opera monopolio riba modem chipnan. E agencia a argumenta cu Qualcomm a hisa prijs di celular y haci daño na consumidonan pa via di su tasa di regalia cu a stop competencia di drenta mercado. E huicio ey a tuma luga na januari, y e partidonan actualmente ta wardando e decision.

Prome cu Apple a lansa iPhonenan cu ta uza chip di Qualcomm, e dos compania a traha hunto pa asina Qualcomm por alcansa e rekisitonan di Apple pa e componentenan. Pa haci esey, e companianan a manda varios e-mail y yamada. E proyecto tabata asina secreto cu e companianan a uza nomber codigo: Apple tabata ‘Maverick’ y Qualcomm tabata ‘Eureka’.

Apple a bisa cu mientras e dos compania tabata den discusion, e ingeniero di Apple e tempo ey, Arjuna Siva, a bin cu e idea cu Qualcomm a patenta despues. Siva, kende awo ta traha na Google, lo testigua den e huicio despues.

Stephen Haenichen, director di ingenieria di Qualcomm y un di su inversionistanan nombra riba e patent, a bisa cu Siva no merece credit pa e invencion. Contestando ki contribucion Siva a haci, el a bisa: “Absolutamente nada.”

Den su testimonio, Haenichen a bisa Apple a pidi Qualcomm pa traha algo e compania no a yega di traha antes, y pa haci e den tempo cortico. Ora Qualcomm a logra, Haenichen tabata contento. “Tabata obvio cu esaki lo cambia e forma con nos ta traha modem”, el a bisa dialuna. “Tabata algo significativo pa Qualcomm.”

Dialuna, Apple a purba di bisa cu Qualcomm tabata den pura y descuida ora el a entrega e patentnan. Mueller, e consehero di Apple, a mustra un slide di Haenichen cu el a presenta na su team. Un slide titula ‘Patents, go get’em’ tin un potret di varios biyete. Un punto bou di e titulo ta bisa ‘poker chips’ y ta nota cu empleadonan por haya $1,500 pa entrega un patent, y otro $1,500 ora e patent wordo emiti.

No ta inusual pa companianan premia nan ingenieronan pa patentnan. Haenichen a bisa cu e tabata purba di curasha su ekipo di ingenieronan, kende tipicamente gusta code y construi pero no presenta nan ideanan y trabou cu abogadonan tocante lenguahe di patent. El a bisa cu e tabata purba di corda su team cu e esfuerso ta bal la pena.