Segun Angela Laclé: Proyecto di agricultura lo yuda baha stress di docente

Un proyecto cu Ministerio di Enseñansa, Ciencia y Desaroyo Sostenibel a bin cune, tin di haci cu promove actividad di agricultura den nos scolnan. Ya caba e minister encarga cu e cartera aki, Rudy Lampe a anuncia cu nan a duna inicio na e proyecto aki relaciona cu plantacion, mata, simia y tur loke tin di haber cu conexion cu naturalesa den nos scolnan.

E proyecto aki cu ta un di e habilidad nan pa siglo 21, ta siña y stimula nos muchanan planta y come di nan mesun cosecha. Angela Laclé ta encarga cu e proyecto aki y nan a cuminsa cu un proyecto piloto di green house na SPO Brasil, pero intencion ta cu esaki por plama na otro scolnan.

Laclé a laga sa cu intencion di e proyecto aki ta di traha un hofi na cada scol basico. El a bisa cu e proyecto tin hopi beneficio positivo ariba e muchanan mes. Pero no solo pa e muchanan, sino pa e docentenan tambe. El a indica cu e proyecto no ta algo cu nan mes a inventa, sino cu tin hopi estudionan haci, y e ta algo cu ta tumando luga pa basta aña caba na diferente otro pais. “Y cada biaha e ta birando mas y mas visibel rond mundo,” el a bisa.

Recicla y baha stress.
E proyecto aki ta yuda e scolnan, muchanan y maestronan den nan bida social y educativo. Mayoria di e material cu ta bay uza ta recicla. Ta un forma pa siña e muchanan recicla hopi material, mirando cu nos ta bibando den un sociedad cu ta gusta benta hopi cos afo cu nos por uza bek. E ta un sistema pa siña nos futuro generacion cuida nos medio ambiente.

Otro punto cu tin di haci cu e meta di e proyecto aki ta pa expone e muchanan di un forma practico, pa nan por siña di loke ta trata medio ambiente y su efecto, ora nos ta cuida esaki pa medio di recicla y planta matanan.

Tambe nan ta crea oportunidad pa den nan scol mes, e muchanan por haya cuminda mas saludabel tambe, cu nan mes a planta. Igualmente Laclé a laga sa cu e proyecto aki lo bira un alivio pa e docentenan por baha stress y nan preocupacion ta bira menos den caso cu un mucha no a bin bon comi na scol pa motibonan social.

E hecho cu nan por bin cu e proyecto di agricultura na nivel di scol basico, tambe ta un forma pa e scolnan aki por bira mas atractivo, segun Laclé. El a bisa cu den e scolnan no nos ta wak casi nada di naturalesa of mata. Investigacion haci ta confirma cu un mucha cu ta den naturalesa ta desaroya hopi mas miho cognitivamente cu un mucha cu ta lanta den concreto.