Minister di Finanzas y Asunto Economico, Xiomara Maduro a elabora riba agenda di landspakket, y tambe e temanan pa locual ta concerni su ministerio, entre nan esun di reforma fiscal.
Un punto cu e mandatario a trece dilanti na inicio di su declaracion tabata cu pa Aruba por haya e yudansa financiero di Hulanda, nos pais tin cu cumpli cu algun di e condicionnan cu ta poni den e landspakket cu a keda acorda cu Hulanda dia 13 di november ultimo.
E mandatario a informa cu pa locual ta finanzas y economia tin shete accion cu ta tumando luga y nan tin un deadline di 1 di maart. Nan ta punto cu ta concerni na maneho financiero, un parti riba impuesto, sector financiero y reforma economico.
Pa loke ta trata impuesto, departamento di Impuesto (DIMP) ta trahando pa presenta un plan pa por investiga cual sistema di impuesto indirecto lo wordo implementa na Aruba. E ta parti di e discusion cu ta bin tumando luga ultimo tempo si e ta bira ABB (Algemene bestedingbelasting), BTW (omzetbelasting), etc.
E mandatario a aclaria cu no ta asina cu e aña aki lo introduci un belasting nobo cu ta reemplasa BBO. Segun e agenda di e landspakket pa e kwartaal aki prome cu 1 di maart, DIMP ta presenta un plan riba kico ta e opcionnan cu tin pa asina sigui investiga cual opcion ta bay surgi na Aruba.
“Esey ta locual na e momento aki ta tuma luga y 1 di maart ta su deadline pa nos por tin e informacion aki,” e mandatario a declara.
Banda di esaki, DIMP ta trahando tambe un plan con nan por mehora nan mesun funcion den nan organisacion pa asina por yega na un sistema di cobransa mas optimal di impuesto. El a agrega cu na nivel di ambtenaar, DIMP a yega na un entendimento cu e otro partnernan den Reino pa Aruba denter di poco por cera un acuerdo di impuesto hunto cu Hulanda, Corsou y St. Maarten pa evita evasion di impuesto den Reino cu ta poni den e landspakket.
