Ayera atardi Aruba Food and Bevarage Association (AFBA) a tene un conferencia di prensa na unda nan a trece pa dilanti e problematica di escasez di personal den e sector di horeca. Un situacion cu ta birando alarmante y cu mester un solucion a corto plaso. Miriam Dabian COO di AFBA a trece pa dilanti e punto di atencion cu ta preocupante.

E problema di escasez di personal no ta algo nobo, e ta algo cu tin varios aña caba ta creciendo. Sra. Dabian a remarca cu pa practicamente dos aña caba nan ta trahando duro hunto cu instancianan di gobierno y ministerio pa por logra provee e necesidad di nan miembronan cual ta personal cualifica of personanan cu tin deseo di traha den e sector horeca.

Na varios ocasion den dos aña AFBA a organisa job fairs pa interesa e hobennan den e industria di horeca y tambe pa duna oportunidad na nan miembronan pa por provee y mustra e vacaturanan cu tin existente den nan negoshinan

El a indica cu mediante e job fairs aki nan a logra yena algun di e vacaturanan, pero no den totalidad y semper ta keda e necesidad di busca personal cu ta na Aruba of personal cu tin estadia legal na Aruba.

“Pero nos ta sigui cu e mesun problema y den e ultimo lunanan e ta birando mas dificil pasobra mientras tanto tin otro hotel cu ta habriendo cu tambe ta bay tin mester di empleado,” el a señala.

Dabian a splica cu hunto cu e job fair nan a haci algun iniciativa, manera entre otro e colaboracion entre AFBA y OAA (Opernbare Avondleergangen Aruba) na unda nan a cuminsa un proyecto piloto cu algun persona cu tin interes pa traha den horeca. Durante nan estudio, cual ta nuebe luna, nan ta haya prome tres luna e parti di teoria y despues nan por haci nan parti di practica na e negoshinan di e miembronan di AFBA.

El a sigui splica cu na e momento aki nan ta den fase final di e estudio y ya caba AFBA ta den combersacion cu OAA pa logra cu e estudio aki no ta cuminsa solamente cada aña, pero si no mas periodicamente durante un aña pa asina por duna mas hoben e oportunidad di drenta den e industria di horeca.

Banda di esaki, Dabian a remarca, el a trece pa dilanti cu Aruba Tourism Authority (ATA) a menciona den su presentacion di plan di mercadeo 2024 cu e industria turistico na Aruba ta bay sigui den crece. Cu esaki tambe nan a resalta cu hopi di e turistanan ta kedando den alohamento alternativo y manera ta conoci tin un paro den hotelnan all-inclusive.

“Tur esaki, mas bishitante na Aruba, mas bishitante den alohamento alternativo y un stop na hotelnan all-inclusive ta duna mas presion riba nos como industria di alimento y bebida pa por provee e necesidad di duna e bishitantenan aki un bon servicio y bon cuminda y bon bebida. Pero nos no por sigui haci’e si nos no tin e personal cualifica, personal adecua pa duna un bon servicio,” el a enfatisa.

El a indica cu miembronan di AFBA tin e infrastructura y capacidad financiero pa por provee e necesidad aki siempre y cuando tin e personal.

Dabian a splica cu den combersacionnan cu gobierno, e organisacion ta papiando pa wak con nan por mehora e comunicacion y con por mehora procesonan cu por facilita e companianan pa por contrata personanan cu ta na Aruba cu ta dispuesto pa traha den e industria.

“Horeca ta un industria cu ta traha di dialuna pa dialuna y orarionan nocturno y hopi biaha mester tin un persona cu tin e pasion y gana pa traha den horeca,” el a resalta.

Ademas di tur esaki, el a indica, AFBA ta planeando un forum dia 15 di februari na unda nan miembronan y instancianan manera SVB, Dimas, DPL y miembronan di ministerio por scucha tur e problema- y dolornan cu e industria di horeca ta pasando aden.

El a agrega cu forum aki tambe lo sirbi pa trece sugerencia ariba con nan por logra yega na otro y con por logra minimalisa e problema existente pa asina sigui desaroya e industria, tanto pa economia di Aruba como pa e bienestar di nan miembronan pa e industria aki por crece den un manera sano, responsabel, sostenibel conhuntamente cu e crecemento di turismo cu ta plania pa Aruba.

Dabian a menciona cu pa motibo di e falta di personal, algun siman pasa nan a scucha cu algun restaurant mester stop nan operacionnan algun dia den siman pa por baha e stress di e empleadonan, pa minimalisa e presion cu nan mester eherce debi na e actual cantidad di persona cu ta traha den cada restaurant.

El a agrega cu tambe algun miembro cu tabatin dos restaurant, mester a cera un di nan pa motibo cu no tin personal pa atende tur dos. Y lamentablemente mas di 90% di nan miembronan tin problema cu escasez di personal.

Dabian a señala tambe cu actualmente loke ta pasando na Aruba ta cu tin desplasamento di empleado. E personanan ta pasa di un caminda pa otro y esey mes lo bay forsa e sistema economico y cu cada miembro tin cu adapta.

El a remarca cu un persona cu kier cambio, cu kier busca otro oportunidad pa crece den otro posicion pero den e mesun industria no ta haci malo, pero na final di dia e persona ki ta move y ta keda un buraco habri otro banda y na Aruba no tin personal suficiente pa cubri e buraconan aki.

Sr. Pierre Kock, Director di Food & Beverage di La Cabana hotel a remarca cu e cansancio di e trahadonan cu tin aworaki no ta saludabel pasobra orarionan largo y falta di personal ta causa tambe cu servicio ta baha y tin mas hotel ta biniendo, pero no tin e personal.

El a indica cu en berdad por tuma un persona sin experiencia y den cuatro luna por train e pa bira waiter of bartender, pero den cuatro luna no por train un persona pa bira un chef y esey ta unda tin e escasez.

“Mester alivia e stress di e trahadonan pasobra e ta hopi intenso y p’esey mes nos ta buscando con pa yega na un solucion pasobra tin mas hotel ta sigui bin, turismo ta sigui crece na Aruba, pero tin posicionnan cu mester wordo yena, specialmente den Food and Beverage. Nos mester yega na un solucion y un acuerdo ariba con nos por procesa e trayectoria mas lihe pa nos por yena e vacatura,” el a subraya.