Segun e enviado pa Venezuela di gobierno Mericano, Elliott Abrams, China aparentemente ta reduciendo su apoyo economico na Nicolas Maduro, y cu Peking a asumi un papel decreciente pa gran parti debi na e sancionnan di Washington contra Venezuela.
Segun cu e papel economico di China a keda reduci, Maduro y su regimen ta birando mas dependiente di Rusia y su gigante petrolero Rosneft, como salbabida financiero pa mantene nan mes na poder, Abrams a comenta.
Abrams a bisa cu e participacion di China na Venezuela “ta disminuyendo, no creciendo” debi na nan preocupacion pa mal maneho di economia y e corupcion di regimen di Maduro. Washington y decenas di otro pais a reconoce Juan Guaido atrobe como presidente interino legitimo di e pais.
“Ta principalmente su opinion cu ta un desastre,” Abrams a bisa encuanto e dudanan d gobierno Chines y a agrega cu e funcionarionan Chines a expresa esey.
E no kier a duna detaye di con China lo a hala atras na Venezuela, excepto cu el a bisa cu “nos no tin conocimento di prestamo o inversion nobo Chines na 2019.”
Pero ora a consulta ministerio di relacion exterior di China tocante e comentarionan di Abrams, e ministerio a laga sa cu “despues di decadas di creciente lazo economico, actualmente China y Venezuela ta deteniendo parti di nos cooperacion, principalmente pa e sancionnan y otro factor.”
Pero crecemento economico Chines a stabilisa y crudo a bira abundante despues di e collapse di prijs di petroleo na 2014, pa cual China tabatin menos di gana cu e relacion cu Venezuela. Ta calcula cu Caracas, atrapa den un crisis economico, ainda debe China casi 20.000 miyon dollar.
