ORANJESTAD – E trahadonan no tin problema si e legendario pacus La Linda ta habri su porta bek, asina abogado Hose Figaroa di FTA a declara na prensa. Al contrario, e ta haya cu si La Linda habri bek, e ta genera entrada pa paga e trahadonan cu tin tur derecho di pago.

Tanten dia 12 di april awor tin un audiencia den corte pa aclaria e situacion di La Linda mes. Eventualmente, a base di un peticion di e bewindvoering, lo dicidi si lo declara La Linda oficialmente bancarota, segun e abogado.

Trahado nan pago
Pero e preocupacion cu e abogado a expresa ta cu e negoshi aki ta bende, pero e trahadonan no ta haya pago. Segun e abogado, te dia di awe e salario di januari no a wordo paga. A lo menos nan mester percura pa paga un parti di e salario cu e trahadonan tin derecho riba dje. Tambe e trahadonan mester por haya nan salario y nan añanan di servicio paga, segun e abogado.

Pa FTA ta inaceptabel cu e trahadonan aki no por gosa di nan beneficionan y derecho, manera nos ley laboral pa prescribi, djis pa La Linda no wordo declara bancarota. E abogado ta haya cu na momento cu La Linda a bay pidi un extension di pago, esaki ta trece como consecuencia cu corte ta bay nombra un bewingvoering, cu hunto cu e doño di e negoshi, lo mester prueba mas tanto si e empresa tin un derecho di existencia si of no. Igualmente pa paga tambe eventual gastonan cu ta keda cana.

Unabes cu a bin cu e bewingvoering, abogado di e trahadonan a negosha cune pa e salario di februari di e trahadonan por wordo paga. Pasobra tur e trahadonan ta den servicio keto bay, y nan tin derecho riba salario. Nan a haya pago di e salario di februari, pero no di esun di januari y tampoco di maart ultimo. Esun di januari a cay den un periodo prome cu e extension di pago a wordo duna. Pero esun di maart no.

“Si e miedo cu La Linda tin ta pa e no bay bancarota, nos ta disponibel pa coopera,” e abogado a bisa tambe. Pero esaki mester tuma luga a base di un ‘negociacion husto y realistico’, el a bisa.

El a agrega cu tur banco ta na haltura di e situacion aki. Tambe tur trahado a haya un carta di parti di FTA, unda nan a bay diferente banco y instancia financiero, pa tene cuenta cu nan situacion. Sinembargo, instancia financiero ta duna nan un temporada pa e trahadonan por cumpli cu nan obligacion. Eventualmente -segun abogado Figora- mester yega na un solucion pa e trahadonan por haya nan pago. Mayoria di biaha ta tres luna e instancia financiero por duna como periodo di gracia. P’esey e ta haya determinante pa por yega na un solucion pronto.

Proposicion
Di parti di abogado di FTA, un proposicion a wordo manda pa gerencia di La Linda. E no por bay den detaye, ya cu ta suma individual pa cada trahado, cu ta depende di nan añanan di servicio. Nan a bin cu un propuesta ya cu gerencia mes di La Linda a pidi pa abogado di e trahadonan presenta un propuesta.

E propuesta a wordo manda na cuminsamento di januari, y te dia di awe e trahadonan no a ricibi un contra propuesta of un contesta concreto, segun e abogado. E ta agrega cu ainda como abogado cu ta representa e trahadonan di La Linda, nan tin un proposicion riba mesa.

“Si nan kier negosha pa yega na algo realistico y algo husto, nos ta disponibel pa coopera”, el a bisa. El a reafirma cu e mester ta algo realistico. Kiermen cu si La Linda ta genera entrada pa paga pakete rasonabel pa e trahadonan, FTA no tin problema cu esaki.

Ainda e trahadonan ta na servicio di La Linda. Pero e abogado no ta descarta cu si nan ta bati bancarota, e trahadonan tin derecho na cesantia door di Banco di Seguro Social (SVb). Te hasta e ta haya cu e por ta un alivio pa e trahadonan, ya cu actualmente nan ta sinta na cas, pero nan no ta hayando nan pago manera mester ta. Pues un bancarota lo por nifica pa e trahadonan cu nan añanan di servicio por wordo paga.

Mal impresion
Otro punto cu e abogado di FTA a trece dilanti den nomber di e trahadonan ta e manera con gerencia di La Linda kier crea e impresion cu e trahadonan ta actuando di mala fe y di un forma incorecto.

Nan a bin crea e impresion cu e situacion aki ta debi na e trahadonan, nan fout. Y p’esey La Linda no por bay dilanti, of ta existi e menasa cu e negoshi ta bay bancarota. “E trahadonan no a scoge pa e situacion cu nan ta aden awe”, Figaroa a bisa. E situacion cu nan ta pasando aden -el a bisa- a wordo crea ‘puramente door di La Linda’.

El a indica cu gerencia di La Linda mes a anuncia cu nan lo bay cera su portanan dia 31 di december ultimo. Pero el a bisa cu despues di e fecha aki, di un forma no formal, sino cu via via, nan a bin tende cu nan lo sigui habri toch. Y nan mes a scoge pa sigui bende, haciendo uzo di un grupo selecto di trahadonan. Mientras cu nan tin un cantidad di trahadonan cu por yuda nan bende y cu den pasado a yega di yuda nan bende pa decadanan largo. Awor La Linda no kier haci uzo di nan. Tin trahado cu tin mas cu 40 aña di servicio. E ta lamenta cu e trahadonan aki a wordo poni den un skina, unda financieramente nan no por bay dilanti.