Diaranson ultimo, miembro di sector priva y sector publico a uni forsa pa combati corupcion durante un tayer interactivo titula ‘Towards Integrity in Aruba’ den e ballroom di La Cabana Resort & Casino. E tayer a keda presenta pa Stichting Deugdelijk Bestuur Aruba, den colaboracion cu Aruba Institute for Good Governance and Leadership di Universidad di Aruba, Saxion Hogeschool y HopeAruba Movement Foundation.
Sr. Armand Hessels di Stichting Deugdelijk Bestuur Aruba a habri e mainta aki splicando tocante e proceso cu a bin ta tuma lugar, ya caba for di algun aña atras, pa por yega finalmente na e National Integrity System (NIS) Assessment pa Aruba y tambe a expresa su entusiasmo pa mira un tayer relaciona cu integridad bira un realidad.
Durante e sesion, dr. Willeke Slingerland di Saxion Hogeschool como investigador principal di e proyecto aki, a presenta e conclusion- y recomendacionnan di e NIS rapport pa Aruba cu a keda publica na April di aña e aki.
Participante di e tayer, cu a representa varios sector den nos comunidad, a haya e oportunidad pa comparti nan pensamento relaciona cu manera practico cu por stimula y fortifica integridad na Aruba riba tereno social, politico, cultural y economico. Algun punto importante cu a keda treci dilanti ta e necesidad pa crea mas conscientisacion y educacion den nos comunidad tocante e tema di integridad y e consecuencianan di corupcion, e posibilidad pa fortifica e codigo di conducta den sector publico y priva y tambe e deseo pa mira mas transparencia combina cu un conducta ehemplar for di nos gobernante- y lidernan den nos comunidad.
Den e siguiente lunanan lo bai organisa mas tayer pa por profundisa den cada area fundamental di e NIS rapport (social, politico, cultural y economico). Cu e pasonan aki, ta desea pa logra concretisa e recomendacionnan colectivo y logra un plan di accion specifico cu por wordo carga door di un base amplio den nos pais.
E organisadornan di e tayer ta contento di mira e interes grandi for di varios stakeholders den nos comunidad cu tambe a scoge pa lanta para, usa nos bos y tuma responsabilidad como ciudadano activo riba nos isla.
