Un di e temanan mas yamativo di e pakete di COHO ta e evaluacion si mester sigui cu florin of introduci dollar como moneda di pago. Un institucion independiente lo investiga kico ta e costonan pa comunidad, y kico ta e pro of contra di un moneda propio versus dollar. E resultado di e analisis lo produci medidanan cu mester keda implementa pa loke ta e structura monetario.

E investigacion sinembargo lo no tuma luga pa awor, sino mas bien na 2022 y Hulanda y Aruba lo delibera riba e resultadonan. Mester bisa cu manera Bon Dia Aruba a publica na september, e asunto di dollarisacion no ta algo nobo. Economistanan y IMF a conseha Aruba pa no introduci su propio moneda na 1986, y scoge pa dollar. Motibo ta cu si a scoge pa dollar, economistanan a bisa cu e ta duna Gobiernonan poco espacio pa desvia di maneho financiero stringente, cu ta locual Gobierno Hulandes, pero tambe institucionnan manera Banco Central di Aruba ta urgi p’e.

Es mas, na 2002, Director Ehecutivo di IMF, Johannes de Beaufort Wijnholds a bisa cu pa por mantene e balor di florin stapel na dollar, Gobierno mester percura pa mantene su maneho fiscal bao control. Florin mara na dollar ta dificulta e absorbacion di shocknan cu ta sucede den mercado internacional asimetrico. Pues Aruba mester tin e disciplina pa purba mantene su inflacion na e mesun nivel cu dollar. Pa florin, y sigur su balor ta stabiel y sostenibel, e ta rekeri tambe pa productividad keda subi constantemente. Den caso cu productividad na Aruba tabata mas halto cu esun di Merca, lo tin fluho di dollar den nos economia y mester ahusta e maneho monetario pa un caso asina. Pero, si productividad na Aruba ta mucho mas abao, e peliger ta cu capital local lo bandona nos pais y mester restringi e maneho monetario. Pero manera COHO a mustra, ta trata di un decision cu mester bin pa 2022.

Bon Dia Aruba a manda un serie di pregunta na Banco Central di Aruba for di momento cu e proposicion di Hulanda a bira conoci, esta si mester considera dollar of no como moneda di pago na Aruba. Sinembargo, a pesar di a manda tur e preguntanan segun palabracion, na luna di juli, no a haya ningun reaccion di Banco Central di Aruba ni di e relacionista publico di Banco Central, cu ta sra. Annemieke Stals.

Sector Financiero

COHO lo yuda Aruba realisa un sector financiero stabiel cu por ehecuta su papel pa sostene su economia real. Y realisa na un forma adecuado, e regulacion di sector financiero unda tin supervision riba cumplimento. Ademas COHO kier mira un institucion di un supervisor cu por actua na tempo y firme ora cu tin problema na companianan financiero.

Lo tin un revision integral independiente di e sector financiero y basa riba e investigacion aki lo formula medidanan pa atende cu cualkier fayo cu por tin. E proposicion ta pa e supervision aki cuminsa pa 15 di December caba. Mester bisa si, cu segun COHO, e sector financiero di Aruba ta operando miho cu esun di Corsou y St. Maarten, pero no ta kita afo cu un bista independiente y supervision lo identifica e debilidadnan cu no ta salta na bista of cu ta identifica posibilidadnan di refuerso y mehoracion. Esaki ta importante mirando cu e impacto macro-economico di Covid19 por ta grandi den e circunstancianan aki, sigur tambe riba e sector financiero. Pues, un revision independiente den e sentido aki ta considera uno di ‘no-regret’.

Tambe prome cu 15 di december lo tin un revision di e structura di ley y regulacion pa e mercadonan financiero. E introduccion di un structura di garantia di deposito ta un fortificacion importante pa e cuadro legal. Pero tambe mester bin modernisacion, particularmente ora ta trata institucionnan cu ta faya. Hulanda a experiencia esaki despues di e crisis financiero y ta te recien a bin cu medidanan al respecto.