Ayera mainta Aruba Entertainmet 2020 a realisa un conferencia di prensa pa duna un relato tocante dos reunion importante cu nan a tene cu crisis team pa loke ta trata medidanan cu lo por wordo implementa pa cu industria di entretenimento.

Nan a expresa cu nan a sinta prome cu minister di Labor y Asuntonan Social, Glenbert Croes y despues cu crisis team caminda cu nan a trece nan preocupacionnan pa esunnan cu ta traha den mundo aki.

Manera a keda conoci algun dianan pasa, nan ta bayendo pa shete luna sin cu nan por eherce nan trabou segun loke Ofo Escudero miembro di e grupo aki a wordo a sigura y ademas cu e situacion di nan ta birando hopi dificil.

Escudero a señala cu tin un cantidad di performance y entertainments cu ta biba 100% di lo cual ta musica, DJ, hende cu tin bailamento como profesion, di tur e partinan aki, Escudero a menciona cu nan a sinta y e dos reunion a bay den un bon ambiente den e cual el a sigura cu nan a compronde tur e parti di nan banda.

Tambe, el a specifica cu nan tin un otro reunion pendiente pa tuma luga y nan ta bay traha cierto protocolnan pa asina nan por cuminsa eherce nan trabou, Escudero a señala cu nan ta bay parti e mundo di entretenimento den musica soft y despues nan ta bay poco poco den musica cu mas ambiente.

“Lo cual ta bay pasa ta cu nos lo ta bay sinta caminda cu nos ta bay poniendo protocolnan hunto pa por eherce nos trabou poco a poco” Escudero a bisa.

Tambe el a remarca cu tin un parti di nan coleganan cu berdad nan ta trahando, pero esey no por compara cu lo cual tabata prome cu Covid-19, nan a perde hopi segun el a manifesta y e ta kere cu un bes cu despues di e reunionnan aki nan lo por sinti cu nan situacion lo por drecha.

Asina mes, el a gradici pa minister Croes pa motibo cu Aruba Entertainment 2020 lo bay ta e organisacion cu lo representa tur e centenar di musico cu ta traha na Aruba.

Escudero a trece dilanti cu nan preocupacion ta con nan ta bay sigui dilanti, cu den tur e tempo aki nan no a haya ningun entrada, el a expresa cu otro gremionan a cuminsa traha y a cuminsa haya aproximadamente un 70% of menos di nan salario den comparacion cu e caso di nan cu su salario a yega na cero.

El a declara cu mundo di entretenimento semper tabatin buraconan habri den ley y cu algun biaha semper ta facil pa bisa cu “no ta bay haya nada for un doño di trabou pasobra bo tin manera un sub-contracto”, pero lo cual ta e preocupacion di nan den teoria ta cu nan kier poco a poco den tur e norma sanitario pa combati e virus purba pa nan por eherce nan trabou.

Escudero a sigura cu tin musiconan cu ta hayando e ayudo FASE pero otronan no, y esey ta un parti cu tambe nan a papia cu minister di Labor pa por drecha esey y lo cual ta bay pasa ta cu e mayoria di nan ta den espera di eherce e trabou aki cu aworaki tin un guideline di loke ta bay pasa.

E doñonan di club of restaurant “tur ta depende di esaki” segun el a sigura, y por ta tabatin cierto incertidumbre pa cu leynan pero awor despues cu nan a papia cu crisis team tur esey lo bay ta un tiki mas claro caminda cu doñonan di restaurantnan of barnan por haya un miho bista di loke nan por y kico no por pa motibo cu e problema grandi, segun Escudero a bisa ta kico por ainda pa via cu tin un incertidumbre di si mag di tin musica of no. Di esaki, el a señala cu nan lo cuminsa traha riba un linea pa poco poco yega na esey.

Ademas, el a comenta cu nan a desea di por a traha esaki desde par di lunanan pasa pa nan por haci nan trabou manera tur hende ta trahando caba pero cu te ainda nan no tin un fecha ‘standard’ caba pa nan por bay bek na nan trabou .

Industria di entretenimento ta un di e sector mas afecta pa motibo di ‘social distancing’ cu Covid-19 a trece cun’e y su ‘side effects’, manera nan ta señala “esaki ta probablemente e sector cu mas haya sla” y cu ta conforma pa musiconan, promotor, DJ, scol di baile, etc.

Aruba Entertainment 2020 ta un grupo di musico y DJ local cu a uni pa forma un asociacion, na prome luga pa representa nan miembro y sector en general.