Awe un delegacion di varios instituto di salud di Medellin, encabesa pa director di ProColombia di e region Caribe, Sr. Carlos Gonzalez ta biniendo Aruba pa promove Colombia como destino di cuido di salud.
Sr. Gonzalez a declara na Bon Dia Aruba cu ta existi un compromiso di e sector di salud Colombiano cu e Caribe Hulandes y muy particularmente cu Aruba. Nan ta consciente cu aunke nan ta den bon posicion como proveedo di salud, semper nan ta buscando con pa satisface nan bishitantenan di Aruba y tambe di Corsou.
Pa tal motibo nan ta trahado programa di promocion y facilitacion entre ProColombia como institucion cu ta prome exportacion y turismo di Colombia, y un total di 29 instituto Colombiano di salud pa ofrece miho tratamento pa e poblacion di Aruba.
Conexion aereo
Tambe ProColombia como organisacion gubernamental ta trahando cu companianan aereo y nan ta apoya e iniciativanan di e sector priva pa bin cu mas vuelo directo entre Aruba y mas ciudadnan di Colombia.
Actualmente el a laga sa cu tin vuelo director pa Medellin, Bogota y Barranquilla. Tambe nan tin proyecto na corto plaso pa bin cu vuelo directo pa Cali y Bucaramanga unda gran cantidad di pashent di AZV ta wordo manda pa tratamento medico.
“Cada bes nota ta pensa riba con nos por haci mas facil pa e ciudadano di Aruba por yega na Colombia y busca e solucion di salud cu nan ta buscando”, segun Sr. Gonzalez.
Sr. Gonzalez a bisa cu a pesar cu Bucaramanga ainda no tin vuelo directo fei Aruba, a registra un crecemento di pashentnan fei nos isla. Mayoria di persona cu ta biaha pa Colombia pa busca nan salud ta yega prome na Bogota pa motibo di conexion aereo.
Pero dependiendo di e tratamento, e pashent di Aruba ta prefera pa bay ya sea Barranquilla y otro ciudad di Colombia pa atencion medico specialisa manera Bucaramanga. Tambe nos hendenan ta gusta biaha pa Medellin, ya cu tin vuelo directo pero nan tin menos frecuencia.
