E siman aki e sector di construccion ta bay re inicia nan trabao cu un serie di rekisito cu e companianan mester cumpli cune den cuadro di e crisis di coronaviorus.
Nan ta restaura nan operacion despues cu nan a keda suspendi mas cu un luna largo, ora cu a wordo decreta e medida di shelter in place y nan a cay den e lista di no esencial.
Durante su presentacion den parlamento pa debati riba e presupuesto di DOW, minister Marisol Lopez-Tromp a informa cu tin un cantidad di proyectonan cu ya caba tabata andando, y cu aworaki nan ta bay reanuda.
E mandatario a mustra un lista di por lo menos 32 proyecto cu ya caba tabata den construccion. El a laga sa cu nan ta diferente tipo di proyectonan cu lo yuda stimula nos economia, unda bes cu nan ta re start bek.
Pero tambe nan tin un lista di proyecto nobo cu el a yam’e como ‘proyectonan potencial’ cu Aruba por inicia cune. Sinembargo tin un serie di condicion mara na nan, entre otro cu e material mester wordo cumpra localmente pa evita cu divisa por a bay afo.
Pero tambe e trahadonan mester ta local y no trahadonan importa. Esaki considerando e hendenan cu a perde trabao. E mandatario ta haya mas cu husto cu esun naci na Aruba lo ta e prome yama pa haya trabao bek.
