Mediador di Gobierno, Anselmo Pontilius lo reuni proximamente cu minister nobo di Labor, Glenbert Croes, unda seguramente e lo trece dilanti e situacion actual cu ta tumando luga den e sector di casino riba nos isla.
“Den general e mundo di casino ta den su luga pa evalua hopi di cerca, con e ta y con e lo ta den e proximo añanan”, segun sr. Pontilius. El a declara na e matutino aki cu departamento di Mediador di Gobierno lo duna cierto recomendacion na e minister di Labor y tambe na otro ministerionan cu tin di haber cu asunto di casino.
El a trece como ehempel e situacion cu a surgi den pasado cu ex Aura Casino na hotel Barceló cu a conoce reapertura. Pero e trahadonan a yega di carga e consecuencia di un ceramento abrupto di e casino. “Logico bo ta purba di evita loke a sosode un biaha mas eynan ”, el a bisa.
Mediador di Gobierno tin cierto sugerencia cu nan lo documenta y presenta esaki na e mandatario di Labor y otro ministernan riba con nan lo por atende cu esaki. Logico cu tin otro partnernan cu mester ta envolvi manera e asociacion di casinonan y e dunado di trabou pa evalua di cerca e sector aki. E atencion aki ta necesario considerando cu esaki ta un sector sumamente importante den industria di turismo.
Pues e ta considera importante pa den e sector aki nan por percura cu tin un claridad awor y den futuro. “Con e mundo di casino ta draai exactamente y kico ta efectonan cu e mundo di casino ta sinti, debi entre otro na cambionan den e forma cu hendenan ta hunga weganan di placa, si of no.”
Panorama
Sr. Pontilius a presenta un panorama breve di e situacion actual di e sector casino. Actualmente nan tin dos situacion cu ta atendiendo como departamento di Mediador di Gobierno. Un tin di haber cu tanto sindicato STA como gerencia di Alhambra a pidi e institucion aki pa intermedia den nan proceso di negociacion cu a pega. Nan tin basta tempo negoshando na mesa y den nan ultimo reunion,considerando cu ta bin hende di afo di e casino pa bin negosha Mediador di Gobierno a duna cierto recomendacionnan verbal.
E siguiente paso ta esun di entrega e recomendacionnan preto riba blanco, loke e sindicato STA a entrega como un oferta basa riba nan recomendacionnan pa wak si nan por yega na un acuerdo. E partidonan aki lo bin hunto dia 7 di december y nan ta spera cu a base di e recomendacion cu awor e sindicato ta trece como oferta, nan lo por supera e diferencia cu a surgi particularmente riba e siman di trabou ya sea di 6 of 5 dia. Esaki ta e punto principal di nan diferencia.
Otro casino cu e instancia aki ta dunando trabou di intermedia ta entre sindicato FTA y gerencia di e casino situa den Riu Antia hotel. Gerencia di e casino aki ta ilustra cu nan no por cumpli cu e peticion cu FTA tin y den e situacion aki, Mediador di Gobierno conhuntamente cu e abogado a redacta un documento. E casino aki ta wordo huur for di RIU Antillas Hotel. Ayera Mediador di Gobierno tabatin programa un reunion cu ambos partido pa mira si nan por firma e documento aki cu basicamente ta un prome acuerdo pa nan atende cu e casino menciona.
Tambe departamento di Mediador di Gobierno a ricibi un peticion pa atende cu Cool Casino cu ta e casino cu ta opera den e hotel Riu Palace. Den pasado tabatin basta discusion fuerte den e casino aki, caminda a firma un acuerdo entre FTA y gerencia di Cool Casino. Awor e partidonan mester topa nan mesa atrobe.
