Director di Banco di Caribe, Sr. Erwin Maduro a anuncia e firma di un CAO nobo hunto cu sindicato FTA cu ta representa su trahadonan. E ta un CAO vigente pa e siguiente 3 aña y mey.
Sr. Maduro a gradici FTA durante e par di luna cu nan a negosha e condicionnan nobo di e CAO cu a keda firma dialuna atardi. E director di e banco a reconoce cu e negociacion no a bay facil, pero nan ta contento cu finalmente nan lo por a firma un CAO nobo. “Cos no ta malo, pero cos no ta di e bon ey tampoco manera nos ta kere”, asina Sr. Maduro a bisa. E ta kere cu e CAO nobo aki sindicato FTA no mag keha, ya cu e trahadonan a bay dilanti.
Economia
El a bisa cu como sector bancario nan ta sintiendo e efectonan di un economia cu no ta creciendo. Sinembargo e ta reconoce cu nan mester tene nan empleadonan contento y pa percura semper un paz laboral. Aunke inflacion ta abou e no ta haya cu esaki por bira un argumento pa no duna aumento.
Segun Sr. Maduro mester bin mas proyectonan pa reactiva nos economia. E ta haya cu aworaki sector comercial no ta inverti pa diferente factor tanto local como internacional. Economia di Merca tin un influencia den nos economia local, y Merca su economia no a crece hopi. Encuanto e eleccion di Trump como presidente di Merca, e no ta haya cu nos no mester tin miedo di dje. E ta kere cu Trump no lo pone mucho atencion na Cuba, manera Hillary lo hacie, y “nos mester wak Cuba como un competencia sigur sigur”.
Aparte di e factor economico a bin mas competencia y e “bolo sigur sigur no ta bay crece”, el a bisa. E presencia di un banco nobo riba nos isla ta nifica cu nan lo tuma clientenan di otro banco, pero nan ta kere den competencia. E ta haya cu competencia ta sano y te hasta e ta pone nan wak nan gastonan di operacion mas di cerca.
Encuanto con solido Banco di Caribe ta y su dependencia cu esun di Corsou, Sr. Maduro a bisa cu Banco di Caribe na Aruba ta un NV local ariba su mes.
