Construccion di Secrets Hotel mester para te ora cu huez tuma decision nobo, y esey ta aki tres luna. Esey ta resultado di un caso cu habitantenan di Seroe Colorado a entama den Corte Administrativo contra construccion di Secrets na e area.
Un total di 10 ciudadano, representa pa abogado Maritza Boyce a acudi na Corte Administrativo, LAR, despues cu Minister di Desaroyo Teritorial, Infrastructura y Medio ambiente a entrega permiso pa construccion di hotel. E permiso tabata otorga dia 28 di Mei, 2020 y e ciudadanonan a entrega nan obhecion contra e permiso dia 21 di October 2020. Pero Minister a rechasa e obhecion dia 9 di Maart 2021 y consecuentemente, e ciudadanonan a apela esaki dia 16 di April 2021. For di e tempo ey, te cu 5 di Januari e aña aki tabatin documentonan presenta na Corte.
Entre otro e habitantenan ta argumenta cu e edificio of parti di e edificio di e hotel no ta cuadra cu e ambiente y e casnan den cercania, y cu ta baha e calidad di aire y luz pa esakinan, y cu e construccion ta contra e ROPv, esta e Planificacion Ordenanza Teritorial cu regla. E argumento cu a usa ta cu e bouwvergunning ta pa un hotel di 600 camber cu un posibilidad di extension di 300 camber despues di dos aña
Minister di Infrastructura tin tres luna pa delibera cu e habitantenan riba e proyecto y tuma un decision riba e obhecion, particularmente riba e expansion di e proyecto pa 900 camber. Consecuentemente, no por sigui construi mas camber ni e espacio pa para auto. E decision tin cu tuma den consideracion si e edificio ta cuadra den e espacio. Ademas, tin un problema cu e erfpacht, ya cu a duna e tereno den erfpacht pa un hotel di 900 camber mientras cu ROPv ta stipula cu maximalmente por construi un hotel di 600 camber.
