Durante weekend, Secrets Baby Beach Resort a tene un apertura oficial pa su Oficina di Trabao nobo, situa na e edificio di Arubus na San Nicolas. E ocasion a conta cu presencia di stakeholdernan, representantenan di gobierno y Parlamento, y representantenan di grupo Martinon, e desaroyadornan di e proyecto Secrets Baby Beach Resort.
Mirando e intencion di e hotel pa habri fin di e aña aki, a cuminsa recluta e trahadornan necesario pa sigura e experiencia cu e huespednan di e hotel ta spera di nan. Pa esaki, a habri un Oficina di Trabao unda hende por acerca pa mira vacatura y busca oportunidad di crece hunto cu e hotel.
E enfasis tabata riba crecemento y desaroyo, pa San Nicolas y pa e trahadornan cu lo bin forma parti di e hotel.
Director di Recurso Humano pa Secrets Baby Beach Resort, Siglaine Besaril-Wever, a duna un discurso den cual el a enfatisa nan conviccion “cu e resort aki lo pone San Nicolas riba mapa como un destinacion turistico di primera clase, generando un crecemento economico significativo pa nos isla.”
“Sinembargo, e nificacion di e proyecto aki ta bay mucho mas leu cu luho y turismo. E proyecto aki ta toca e hende, nos hende, nos comunidad, nos bisiñanan y nos futuro coleganan. Un proyecto cu den tur faceta a tene cuenta cu su futuro empleadonan. Pa es motibo aki, mi no por keda sin menciona e palabra ‘calidad di bida’, no solamente pa esnan p’ariba di brug, tambe pa esnan p’abao.”
Enrique Martinon, presidente di Grupo Martinon, e grupo hotelero tras di e proyecto, tambe a duna un discurso durante e apertura. “Awe nos ta celebrando e inicio di e oficina aki di reclutamento cu ta un momento di hopi alegria. Si nos mira atras, pa nos ta cinco aña, cu pandemia di por medio. Nos a haya hopi dificultad pa logra yega unda nos ta. Ya awo e ta un realidad. Mi sa cu pa boso, y pa Aruba y pa San Nicolas, ta hopi mas tempo ta warda un inversion di e tipo aki.” El a agrega cu “nos kier logra pa e hotel aki bira un hotel di referencia, no solamente pa Aruba, sino pa henter Caribe, y un hotel di referencia ta logra di varios manera, cu instalacionnan excelente cu ta bay tin, un servicio excelente, e standardnan di e marca Hyatt Secrets Baby Beach cu ta haltisimo, tur esaki ta bay yuda hopi. Pero lo principal ta e hendenan, y awe ta trata di esaki, di e hendenan.”
Presidente di San Nicolas Business Association, SNBA, Errol de Freitas, a duna palabra tambe, celebrando e ocasion. “The best is not yet to come; the best is here,” el a indica. “Tin nos propio hotel no ta djis un capitulo nobo pa San Nicolas, pero e parti bunita di tur esaki ta cu esaki no mester ta dificil pa comunidad di San Nicolas y su alrededor, pasobra nos ta compronde servicio.”
E ceremonia a conclui cu e cortamento di e cinta pa asina duna apertura oficial na e Oficina di Empleo, cu un invitacion pa pueblo di Aruba, y specialmente di San Nicolas, yega pa asina crece hunto cu Secrets Baby Beach Resort.
