Un pisca den lama profundo por sconde su djentenan enorme for di su presa, pasobra su djentenan ta virtualmente invisibel – te ora ta mucho laat. Kico ta e secreto di e pisca dragon? Su djentenan ta transparente, y awo cientificonan a descubri con e pisca a logra esaki. E hallazgo a wordo publica ayera den e journal Matter.
E pisca dragon ta un predador chikito cu djente manera hangua cu ta sali di un cachete cu por extende pa morde presanan casi mita di su tamaño. “Nan ta parce monster”, segun Marc Meyers di Universidad di California, San Diego. “Pero nan ta mini monster” – mesun largo cu un potlood.
A pesar di nan tamaño chikito, e pisca aki ta na e top di e cadena alimentario den lama profundo, unda ta casi completamente scur. Pa haya cuminda of compañero, hopi animal tin bacteria cu ta genera luz red of blauw. Esey ta yama bioluminiscencia.
Uzando microscopio, Meyers y su team di investigacion a examina e djente di e pisca dragon cu nan a saca di un profundidad di 500 meter bou awa na costa di San Diego.
Djente di e pisca dragon ta traha di e mesun material cu djentenan humano – un capa protectivo di esmalte riba e superficie, y un capa duro y profundo di dentina. Pero e mineralnan tin un structura microscopico mas fini, organisa sin ordo specifico. “Esey a sorprende nos hopi”, Meyers a bisa.
E resultado ta cu luz den e ambiente of for di bioluminiscencia – hasta di e pisca dragon su mes – no ta refleha riba e djente. Na su luga, mayoria di luz ta pasa a traves di e djente, pues nan ta keda casi completamente scondi. Esaki, segun e cientificonan ta kere, ta haci e pisca dragon un jaagdo silencioso.
Djente transparente por ta un strategia comun entre predadornan den profundidad di lama, segun Christopher Kenaley, un biologo di pisca na Boston College, kende no tabata parti di e estudio, notando cu otro pisca ta comparti e caracteristica aki. Entre esunnan mas conoci ta e anglerfish, creaturanan cu ta zwaai un parti manera un palo briyante for di nan cabes pa atrae presa.
Niun hende a yega di mira un pisca dragon alimentando den naturalesa, pero e investigadonan ta haci un bon argumento cu e djentenan transparente aki por ta un adaptacion evolucionario pa jaag den lama profundo, Kenaley a bisa.
