Candidato pa liderazgo conservador, Michael Gove a bisa cu e tin gran arepentimento di a uza cocaina mas di 10 aña pasa. El a bisa e publicacion Daily Mail cu el a haci uzo di varios droga na ‘evento social’ tempo e tabata traha como periodista.
Secretario di medio ambiente a bisa cu e ta kere cu no mester tene e ‘eror’ aki su contra, pa evita e bira e prome ministro. Miembro di e partido mester scoge un lider nobo, despues cu Theresa May a retira di e posicion.
Grove, kende a sirbi manera secretario desde 2015 te cu 2016, a bisa cu el a haci uzo di droga tempo cu e tabata un hoben periodista, un eror. “Mi ta wak tempo atras y mi ta desea di no a haci’e. Tur politico a biba un bida den nan pasado. Ora mi mes tabata traha como periodista, mi no a pensa cu mi lo drenta politica of den servicio publico.”
El a agrega cu e sa e daño cu droga ta haci, y pa e motibo aki, e ta repenti di a tuma decision ey. Como un sostenedo di Brexit cu un cantidad di experiencia den gabinete, e ta un faborito entre su coleganan.
Ta spera cu e secretario di medio ambiente por keda eligi na e prome ronda di votacion den parlamento. Pero si e keda entre e ultimo dos candidato, conservadonan fuerte no lo por pordona su pasado. E partido tin 120.000 miembro, cual mayoria ta persona mayor. E por ta cu e tema no ta central, pero nan por tin un vision tocante uzo di droga mas negativo cu e generacion mas hoben.
Nan mester ta cauteloso, pasobra e miembresia ta conservador den nomber y conservador den naturalesa.
