A7 WTO (NP) (1).jpg

E prome dia di e conferencia di turismo Happiness 360, a tuma luga ayera den Renaissance Convention Center. Un dia cu diferente orador cu speechnan interesante. Un sala cu ministernan, parlamentario invitadonan internacional y representantenan di turismo, aunke por ripara cu tabata falta representacion di e sector hotelero local.

 

E Secretario General di United Nations World Tourism Organization (UNWTO) Taleb Rifai a duna su discurso parti mainta.  Durante un sesion cu 400 studiante di EPI y Universidad di Aruba el a anuncia cu lo regala 4 beca na e miho 4 studiante di Hospitalidad.

 

Turismo awendia ta responsabel pa 10% di GDP y 7% di exportacion y 30% di comercio y servicio mundialmente. E ta creando 1 di cada 11 trabou rond mundo. Na aña 2015 tabatin 1187 miyon biahero internacional cu a crusa frontera den un solo aña. Esey ta casi 1.2 biyon biahero internacional. Esey ta casi 1 di cada 7 hende na mundo cu ta haci un biahe internacional cada aña. Esaki no ta un actividad normal. Esaki ta un revolucion di biahe. Patras di e numbernan aki tin hopi mas, segun Sr. Rifai. E ta algo hopi poderoso cu ta reduci desigualdad, ta crea trabou, ta prosperidad y siguridad.

 

Hopi sociedad cu a lubida nan rikesanan cultural a re descubri nan mes door di mustra/ propaganda esaki na nan bishitante. E industria turistico ta uno cu ta siña nos biba consciente y cortes cu otro, e ta bisa. “Ami a biaha rond mundo y mi no por pensa di un luga cu mi no a bishita, pa e motibo aki mi ta un miho persona. Biahamento ta haci nos hendenan diferente. E ta habri nos curason y nos mente, e ta laga nos wak mundo na un manera diferente y mi ta kere fielmente cu mundo lo ta un miho luga si nos biaha. Bo hamas por carga sentimento di odio pa hende cu bo a bishita y come nan cuminda, scucha nan musica y comparti nan custumbernan. E ta haci mundo un luga mas miho.”

 

 “Esaki ta parti di e motibo cu ta presente na e conferencia aki, pa midi e satisfaccion y felicidad.”

 

‘Hopi lider no ta tuma turismo na serio’

“E palabra turismo y hasta felicidad no ta wordo tuma cu seriedad na hopi parti di mundo. Desafortunadamente hopi lider mundial ta enfoca mucho hopi riba balor di cos, sin mira e esencia di balor di cos. Nan no ta tuma turismo serio, nan ta asoci’e den nan mente cu falta di seriedad den bida. Kisas parti di dje ta trata disfruta di bida, pero e trabou, mehoracion etc. cu ta bin cun’e, mester wordo reconoci y Aruba por guia e caminda. Nos ta sufriendo rond mundo actualmente cu hopi deficit. Deficit economico ta uno cu mi ta sigur prome minister y hopi otro lider sa di dje. Deficit di husticia, deficit tecnologico etc. pero e deficit di mas grandi ta e deficit di tolerancia y inhusticia.”

 

‘Integra turismo cu cultura’

Tin algun accion hopi importante cu por yuda nos bay den e direccion di miho turismo

Integra turismo cu cultura. Ora cu nos traha hunto nos ta traha miho, p’esey mi ta contento pa mira e desaroyonan aki na Aruba. Di dos, e ta crucial pa respeta y duna poder y haci e comunidad local parti di dje. E mester ta un acto cu localnan ta brasa, pasobra sino e lo faya. Mester compronde cu no por traha hotel 5 strea den comunidad di 3 strea. Mester percura pa turismo trece trabou cu ta contribui na e desaroyo unda cu ta yuda e comunidad sali for di situacionnan di dificultad. Mester percura cu turismo tin un fundacion etico. 1.2 biyon turista kiermen 1.2 biyon oportunidad, pero tambe e por kiermen 1.2 biyon desaster . Un boter di plastic riba beach por significa un desaster awo imagina 1.2 biyon boter. Un acto chikito mester wordo multiplica pa e poder pa haci e mundo un miho luga.”