Secretario General di MEP ta splica cu ta prohibi pa lubida e politica di engaño y corupcion di Mike Eman y AVP. Awe solamente kier recorda pueblo con Mike Eman a uza prensa cumpra (Speed cu Patrick, kendenan a cobra mas di 6 miyon di placa di pueblo y te awe sin paga belasting), pa asina manipula henter un pueblo.
Nan strategia retorica, unda cu ta keda bisa un mentira repetitivamente pa asina haci comosifuera cu ta berdad. Hopi biaha e mente di un ser humano ta capta algo momento bo ripitie cantidad di biaha sin tene na cuenta si ta berdad of no.
Un otro prueba dia a gara Mike Eman y AVP ta gaña y manipula: Secretario General di MEP ta splica cu e oportunidad cu pueblo a brind’e pa sirbi pueblo como parlamentario (2017-2021) a dun’e herment (tools) legal den Parlamento pa por desenmascara AVP cu prueba. Mike Eman y AVP constantemente desde 2009 a gaña pueblo cu manera nan drenta gobierno, nan tin e formula pa baha prijs di awa y coriente cu 45.5%. Esaki tabata nan campaña pa desacredita MEP e tempo aya. Momento AVP a drenta gobierno y hunto cu nan satelitenan (Speed y Patrick) nan a keda gaña pueblo cu nan a logra baha prijs di awa y coriente . Constantemente Mike Eman y henter AVP tabata ripiti cu AVP a reduci prijs di awa y coriente “from day one” cu 16.6%. Esaki tabata nan retorica. Pues, manera MEP a logra drenta gobierno su parlamento a bay haci un investigacion legal riba expresionnan di AVP y manipulacion di nan prensa comprometi.
Investigacion cu data real: Como parlamentario na 2018 a manda puntra WEB por escrito (schriftelijk) e prijsnan di awa y coriente desde 2009 pa 2018, incluyendo e prijs pa bari di fuel pa e mesun periodo. Basa riba e informacionnan ricibi oficial di WEB N.V. por a haci e investigacion aki uno sumamente exitoso pa desenmascara Mike Eman y AVP. Mike Eman ta sinonimo di Profeta Falso Hananias. Pues, un profeta di mentira y ta uza tur recurso di pueblo pa gaña un pueblo. Asina el a uza Speed y Patrick, kendenan a ranca mas di 6 miyon di pueblo sin paga belasting.
Cifras y data saca di rapport di WEB cu a wordo manda pa Parlamento na 2018: Prijs pa kWh ( kilowattuur) na 2009 tabata 0.2713 cent y na 2017 esaki tabata 0.3681 cent. ( Bron WEB). Pues, ora bo calcula a base di Data Oficial di WEB, pa locual ta trata prijs di coriente den comparacion unda AVP a haya esaki na 2009 (0.2713) y unda AVP y Mike Eman a entrega esaki na aña 2017 (0.3681), despues di 8 aña di e desaster di AVP, por tuma nota cu Mike Eman y AVP a percura pa un aumento di 35.7% di prijs di coriente durante 8 aña. Nos por corda con AVP a kita e brandstofclausule te hasta for di e recibo y scondie den e prijs. Nos por corda manifestacion masal di pueblo contra e aumento 1 di october 2014 y unda Mike a forsa bruto contra pueblo. Pues, locual awe nos kier mustra cu prueba y cifranan real di WEB ta cu Mike Eman, AVP y prensa cumpra (Speed y Patrick) pa 8 aña largo a gaña pueblo cu AVP a reduci prijs di coriente cu 16.6% ( grabacionnan t’ey) y cifranan y realidad ta totalmente otro. P’esey secretaris di MEP ta haci apelacion na henter pueblo pa ta atento cu e mentiranan cu e grupo di lobonan aki. Pa nan yega na poder nan ta dispuesto pa keda uza mesun strategia. Finalmente, pa con lihe e mentira ta, semper e berdad ta alkanc’e. Esaki ta un prueba con e berdad a alcansa e mentira di Mike y AVP.
