Awe San Nicolas Business Association (SNBA) ta organisa un cumbre bou e lema: ‘The time is now!’cu participacion di Gobernador di Aruba, Alfonso Boekhoudt kende ta realisa e acto di apertura. Tambe e lo hiba palabra den e evento aki, unda lo atende e situacionnan mas urgente di pariba di brug. Pero no solamente riba aspectonan comercial, sino social tambe.

Un refleho di e situacion aki tin di haci cu di e ultimo 20 miembronan di e asociacion aki concentra riba caya principal, alrededor di 5 pa 6 establecimento ta bay cera nan porta na januari, si no bin cu un accion rapido. Actualmente economia ta hopi slow pariba di brug, y si esaki no cambia, e establecimentonan ta cera nan porta.

Den e prome cumbre aki ,organisa pa SNBA y cu ta tuma luga na Santa Teresita Center, nan a invita tur stakeholder y tambe esunnan clave den toma di decision, logicamente gobierno di Aruba cu su ministernan, y hefenan di departamento. Ya cu nan deseo ta cu e cumbre aki lo por produci accionnan concreto den e proximo seis luna, for di september awor pa april 2020, pa atende cu e situacion actual di e districto aki.

A pesar di e situacion tenso actual, ta existi un gran interes pa bin cu inversion nobo. Cantidad di organisacion a acerca e asociacion aki pa participa den e cumbre. E interes tabata asina grandi cu a yega un momento cu nan no por acepta mas. Pero nan tin pensa di bini cu un di dos cumbre pronto.

Inversionistanan
Den e cumbre lo tin invitadonan di sector publico, y logicamente di sector priva. Secretario di SNBA, Errol De Freitas a declara cu lo tin varios inversionista local y internacional interesa di participa den e cambionan necesario pa San Nicolas y vecindario.

“Nan tin nan proyectonan cla pa inverti,” el a bisa. E evento aki lo bira un escenario ideal pa cualkier inversionista of persona bin cu proyectonan cu por funciona na San Nicolas, pero tambe pariba di brug, ya cu SNBA a extende su teritorio di atencion. Nan vision no ta concentra pa bin cu un desaroyo den caya of den areanan atractivo di Promenades. Sino cu SNBA ta papiando di un desaroyo pariba di brug completamente.

E cumbre aki tambe ta un fuente di informacion pa sa mas den detaye tocante tur e proyectonan cu ta bay cuminsa, entre nan esun di e hotel nobo na Sero Colorado. Segun De Freitas, e proyecto aki lo bira un catalisado di e desaroyo nobo na San Nicolas y vecindario. Tin tres negoshi cu a anuncia caba cu lo habri na Savaneta.

Alrededor di 25 oradonan ta participa den e cumbre aki. Tambe tin un grupo grandi di inversionista local cu por crea un compromiso pa inverti y bin cu un panorama positivo. Tin varios compania cu a compromete nan mes pa bin cu negoshi. Ya tin algun hecho importante, manera un cinema cu a habri recientemente. Pero tras di e cinema tin mas inversionista cu tin pensa di bin cu restaurant y pacus.

De Freitas a cualifica e evento aki como un ‘cumbre serio’. E expectativa y speransa ta grandi awe pa e cumbre aki por bira un exito totalmente.